Jaqynda «NewTimes.kz» saıty qazaqstandyq depýtattardy «memleket bergen qyzmettik úılerinen aıyrý kerek pe?» degen saýalnama jasaǵan. Saýalnama qorytyndysy boıynsha, qazaqstandyqtardyń basymkópshiligi depýtattar men sheneýnikterdi qyzmettik páterlerinen aıyrý tıis dep esepteıdi eken. Sondaı-aq, saýalnamaǵa qatysqan ár ekinshi daýys berýshiniń pikiri osyǵan saıǵan. Bul týraly «Qamshy» portaly habarlaıdy.
Jaqynda ǵana QR Parlamentiniń qos palata depýtattary kezekti demalystaryna shyqqan bolatyn. Al «NewTimes.kz» saıtynyń saýalnamasy halyq qalaýlylarynyń eńbek demalasy kezeńine tuspa-tus kelip otyr.
Saıt avtorlarynyń aıtýynsha, qazaqstandyq depýtattar memleket bólip bergen Astanadaǵy jyly úılerin tastap, kezekti eńbek demalasyna taraǵan. Dese de álem elderi jahandyq daǵdarystyń salqynyn sezip, álemdik ekonomıka aýyr kezeńniń aldynda tur deıdi. Elbasynyń ózi – memleket qarjysyn ońdy-soldy shashýdy toqtatý kerektigin, aldymyzda kele jatqan ekonomıkalyq daǵdarystyń saldary aýyr tıetinin eskertkenimen, negizgi salmaq qara halyqtyń ıyǵyna túsetini belgili.
Al, saıt avtorlary «osyndaı alaǵaı da, bulaǵaı shaqta qazaqstandyq «zańshyǵarýshylar» «salyqtóleýshilerdiń» esebinen úlken appartamentterde turýy tıis pe»,- degen suraqty oqyrmanǵa qoıǵan. Saýalnama nátıjesi tómendegideı bolǵan.
Daýys berýshilerdiń 49,6 paıyzy – daýys berýshilerdiń esebinen kún kórip júrgen depýtattardiki uıat jaǵdaı dep eseptese, 26,2 paıyz respondent olardyń árqaısysynyń Astanada jeke múlki bar dep esepteıdi eken. Eń qyzyǵy 12,1 paıyz daýys berýshiler májilismender men senatorlardy jaldamaly páterlerge kóshirýdi qoldaǵan.
Iá, 6,2 paıyz daýys berýshi ǵana depýtattardy jaqtap, olarǵa degen senimniń joǵalmaǵanyn bildirse, 3,2 paıyz respondent olardyń halyq úshin qaltqysyz jumys istep otyrǵandaryna senedi eken. Iá, aıtpaqshy, 3 paıyz daýys berýshiler – qazaqstandyq depýtattar bir ǵana jalaqyǵa jumys jasaıdy depti. Al, saýalnamaǵa barlyǵy 821 adam qatysqan.
Nurzat Toǵjan
