Qalalyq ınfraqurylymdy jańartý aldaǵy 5 jylda ınvestısıa úshin jańa alańdar ashady, dep aıtty Baqytjan Saǵyntaev Almaty Investment Forum-da sóılegen sózinde.

– «Jańa Almaty» jospary boıynsha 834,5 mlrd teńge kóleminde buryn-sońdy bolmaǵan salymdardyń salynatyny boljanyp otyr. Aǵymdaǵy baǵam boıynsha bul 2 mlrd 155 mln dollardy quraıdy. Biz Sizderdi bıznes seriktestik pen yntymaqtastyqqa shaqyramyz. «Jańa Almaty» men aglomerasıany damytý josparlary qalalyq ekonomıka úshin mańyzdy draıverler dep sanaımyn. Osy artyqshylyqtardyń barlyǵy bizge keıinge qaldyrmaı, qalamyzdy kúshti, serpindi ósip kele jatqan, básekege qabiletti ete túsý úshin qala ekonomıkasynda qurylymdyq manevrdi bastaýǵa múmkindik beredi, – degen shahar basshysy mundaı qurylymdyq manevrdiń mánin túsindirdi.

– Búgingi kúni, qala ekonomıkasynda jetekshi sala kóterme jáne bólshek saýda – shamamen 32%; odan keıin qarjylyq jáne jyljymaıtyn múlikpen jasalatyn is-sharalar. Ónerkásip, qurylys, áleýmettik ekonomıka jáne jańa ındýstrıanyń úlesi shamaly. Bul rette, kóbinese dástúrli jáne arhaıkalyq saýdanyń roli basym. Elektrondy komersıanyń jalpy úlesi 3-5%-dan aspaıdy. Mundaı jaǵdaı qalanyń qarqyndy damýyn edáýir tejeıdi. Bul qalanyń ekonomıkalyq júıesiniń álsiz tustary bolmaq. Sondyqtan, biz jańa tehnologıalyq taýarlar men qyzmetterdi damytý úshin qurylymdyq reformalardy júrgizýdi qolǵa alamyz. Qurylymdyq manevrdiń túpki maqsaty – eksporttyq óndiristi damytý. Almaty óndirýshileriniń álemdik joǵary tehnologıalyq ekonomıkadaǵy úlesin arttyryp, qatysýyn ulǵaıtý. Tek sonda ǵana qala álemdik arenada básekege qabiletti ekonomıkalyq ósýdiń jańa modeline ıe bolady. Biz ınvestorlardyń qyzyǵýshylyǵyna senemiz jáne búgin men sizderdi osy aýqymdy jumystardy seriktestese birge atqarýǵa shaqyramyn, dedi ákim.