2020 jyldan bastap «Bolashaq» stıpendıasyna arnalǵan kvotanyń barlyq túri alynyp tastalady. Bul týraly Ortalyq komýnıkasıalar qyzmetindegi baspasóz máslıhatynda QR Bilim jáne ǵylym vıse-mınıstri Rústem Bıǵarı aıtty, dep habarlaıdy QazAqparat.

Onyń aıtýynsha, QR Memlekettik hatshysy, shetelde kadr daıyndaý jónindegi respýblıkalyq komısıanyń tóraǵasy Qyrymbek Kósherbaevtyń tapsyrmasyna sáıkes, «Bolashaq» baǵdarlamasynyń jańa erejesiniń jobasy engizilgen.

Oǵan sáıkes, kelesi jyldan bastap úmitkerlerge jańa talap qoıylady. Atap aıtqanda, basymdyqqa ıe mamandyqtarǵa basa nazar aýdarylady. Stıpendıaǵa úmitkerler aǵylshyn tiline jetik bolǵandyqtan kelesi jyldan bastap shetelge jibermes buryn tildik daıyndyqtan ótý talaby alynyp tastalady.

– Taǵy bir jańalyq – biz kvotanyń barlyq túrinen bas tartamyz. Qazir memlekettik qyzmetshiler úshin, ınjenerlik-tehnıkalyq mamandyqtar úshin kvota bar. Osy kvotalar joıylady. Bir ǵana jalpy konkýrs jáne maqsatty daıyndyq bolady, – dedi Rústem Bıǵarı.