Taıaýda prezıdent Qasym-Jomart Toqaev 2020-2022 jyldarǵa arnalǵan memlekettik búdjetke qol qoıdy. Osy oraıda Qamshy.kz aqparat agenttigi 2020 jyly eń tómengi zeınetaqy men eńbekaqy mólsheri, aılyq eseptik kórsetkish pen eń tómengi kúnkóris deńgeıiniń qansha bolatynyn, áleýmettik járdemaqy kimderge berilip, kimderdiń jalaqysyna ústemaqy qosylatynyn anyqtap kórdi.
2020 jyly eń tómengi eńbekaqy mólsheri (42 500 teńge) ózgerissiz qalada. Al memlekettik bazalyq zeınetaqy mólsheri 16 839 teńge, zeınetaqynyń eń tómengi mólsheri 38 636 teńge bolady.
Aılyq eseptik kórsetkish 2651 teńgeni qurasa, eń tómengi kúnkóris deńgeıi 31 183 teńgege teńestirilmek.
Tyshqan jylynda kópbalaly otbasylarǵa arnalǵan áleýmettik kómektiń jańa túri usynylady. Otbasylyq tabys eskerilmesten 4 balasy bar otbasylarǵa 42 500 teńge, 5 balaǵa – 53 125 teńge, 6 balaǵa – 63 750 teńge, 7 jáne odan da kóp balalarǵa 74 375 teńge tólenedi.
2020 jyly ataýly áleýmettik kómekti berý de jalǵasyn tabady. Eskere ketetini, memleket atalmysh járdemaqyny taǵaıyndaýda otbasylyq tabysty eseptep, osy arqyly járdemaqyny shynaıy muqtaj azamattardyń ǵana alýyn qamtamasyz etpek. Bul úshin eńbekke qabiletti otbasy múshesine jumys usynylady. Jumystan bas tartqan jaǵdaıda, AÁK tólemi tutas otbasy úshin toqtatylady.
Sondaı-aq 2020 jylǵy 1 qańtardan bastap muǵalimderdiń jalaqysy 25%-ǵa, mádenıet salasyndaǵy qyzmetkerlerdiń eńbekaqysy 35%-ǵa, keıbiriniń jalaqysy 50%-ǵa deıin, áleýmettik sala qyzmetkerleriniń eńbekaqysy 30-60%-ǵa deıin artady.
Pikir qaldyrý