Álemniń birqatar buqaralyq aqparat quraldary Qazaqstan prezıdenti Qasym-Jomart Toqaevtyń Germanıaǵa is-saparyna úlken mán berip jatyr. Toqaev sapar barysynda nemis kásipkerlerimen júzdesip, kansler Angela Merkelmen de kezdesti.

Bir qyzyǵy, Qazaqstannyń ánurany oınalǵan kezde Germanıa kansleri Angela Merkel ornynan turǵan joq. Tek Toqaev qolyn ádettegishe júreginiń tusyna qoıyp turyp Ánuranǵa qurmet kórsetti. Al nemis kansleriniń ornynan turmaý sebebin qalaı túsindirýge bolady? Bul qazaq ánuranyn qurmettemegendik pe? Joq olaı emes!

Aqıqatyn aıtý kerek, bul birinshi kezdesip otyrǵan oqıǵa emes. Naqty aıtsaq, ústimizdegi jyldyń maýsym aıynan bergi halyqaralyq kezdesýlerde nemis kansleri ánuran aıtylǵan kezde oryndyqta otyratyn bolyp júr. Qyrkúıekte Qytaıǵa, qarasha aıynda Úndistanǵa barǵan sátte de osy kórinis qaıtalandy. Bul jaǵdaı onyń densaýlyǵyna baılanysty ekeni sózsiz.

Eskerte keteıik, osydan birneshe aı buryn maýsym aıynda Angela Merkel Ýkraına prezıdenti Vladımır Zelenskıımen, odan keıin shildede Fınlándıa premer-mınıstri Anttı Rınnmen kezdesýde Angela Merkel jaısyz sezinip, denesi qaltyrap, ózin ázer ustaǵany belgili. Sodan bergi resmı kezdesýlerde ánuran oınalǵan sátte nemis kansleri oryndyqqa otyryp júr.