Saltanatty rásimdi ashqan Ulttyq sport qaýymdastyǵynyń qurmetti prezıdenti Qaırat Satybaldyuly ulttyq sport oıyndaryn nasıhattaýǵa aıryqsha úles qosqan barlyq úzdikter men jankúıerlerge alǵysyn bildirdi.

«Bıyl elimizde ulttyq sport túrlerinen Álem, Azıa chempıonattary men respýblıkalyq týrnırler, festıváldar jáne taǵy da basqa aýqymdy is-sharalar ótkizildi. Myńdaǵan adamdar ulttyq sportpen turaqty túrde aınalysady. Elimizdiń barlyq óńirlerinde ulttyq sport mektepteri men klýbtar jumys isteıdi. Buryn aýyl arasyndaǵy toı-merekelerden ǵana tamashalaıtyn ulttyq sportymyzdyń, búginde halyqaralyq deńgeıge kóterilip, álem nazaryn aýdara bastaǵany táýelsizdik men beıbit kúnniń arqasy», - dep atap ótti Qaırat Satybaldyuly.

«Nur Otan» partıasy Tóraǵasynyń Birinshi orynbasary Baýyrjan Baıbek óziniń quttyqtaý sózinde memlekettik til, mádenıet jáne dástúrdi barlyq ulttyq qundylyǵymyzdy saqtaı otyryp qana damyta alatynymyzdy tilge tıek etti.   

«Táýelsizdik alǵaly beri Elbasy, «Nur Otan» partıasynyń Tóraǵasy Nursultan Nazarbaev eń basty qundylyǵymyz – tilimizge, mádenıetimizge, rýhanıatymyzǵa basymdyq berdi. Sonyń arqasynda til mártebesi kóterilip keledi. Endigi ýaqytta jastardy buqaralyq sportqa baýlýymyz qajet. Onyń eń mańyzdysy – ulttyq sport. Óıtkeni ol – halyqtyń rýhyn kóteretin mańyzdy shara. Kópshilik qoldaǵan halyq partıasy retinde «Nur Otan» osy bastamany qoldap keledi. Prezıdent Qasym-Jomart Toqaev jaqynda ulttyq sport túrlerin jańǵyrtýǵa qatysty naqty tapsyrmalar berdi. Osyǵan oraı partıanyń saıası doktrınasynda kózdelgen qundylyqtar – qazaq tili, rýhanıatymyz ben dilimiz basym baǵyttarymyzdyń biri bolyp qala beredi», - dedi Baýyrjan Baıbek.

Bıylǵy jyldyń kúzinde «Nur Otan» partıasynyń qoldaýymen, elimizdiń birqatar óńirinde aıtys festıvalderi uıymdastyryldy. Aıtys óneriniń dodasy 16-17 jeltoqsanda Oral qalasynda ótetin «Altyn dombyra» respýblıkalyq festıvalinde máresine jetedi. Erteń 7 jeltoqsanda «Astana» konsert zalynda jyrshy-termeshilerdiń «JYR AMANAT» konserti ótedi. «Nur Otan» partıasy janyndaǵy «Mıras» respýblıkalyq qoǵamdyq keńesi músheleriniń bastamasymen memlekettik tildi damytý tetikterin pysyqtaý úshin arnaıy komısıa qurylǵan bolatyn.