Qazaqstan Respýblıkasynyń İshki ister mınıstri Qalmuhambet Qasymovtyń nazaryna

Keshe túnde Almaty qalasynyń turǵyny, Qytaıdan kelgen qandasymyz Erjannyń otbasy oryny tolmas qazaǵa ushyrady. Erjannyń úıinde joqtyǵyn paıdalanyp, onyń jaqyn aǵaıyny 19 jastaǵy Elmurat Sheshenqululy men jary 34 jastaǵy Nurgúl Menesbaevany óltirgen qanisherler dalada oınap júrgen 7 jastaǵy Sylamnur men 3 jastaǵy Syrmuhammetti úıge shaqyryp, tunshyqtyryp óltirgen. Olar kásipkerlikpen aınalysatyn Erjanniń úıinde mol aqsha bar dep oılasa kerek, úıdegi shaǵyn seıfti alyp iz sýytqan.

Qazirgi qolda bar málimetterge súıensek, kúdiktiler 1983 jyly týylǵan bir ózbek azamaty men 25 jastar shamasyndaǵy eki Taldyqorǵandyq jigit. Erjannyń úıinde eýroremont jasap júrgen olar seıfti Kóktóbe mańynda bir úıge aparyp, ashpaq bolyp jatqan jerinen tutqyndalǵan.

Bul sumdyq oqıǵany estigen Almatydaǵy aǵaıyndar men Qytaıdaǵy qandastarymyz qazaq qoǵamyndaǵy mundaı qatigez qylmystardyń kún sanap kóbeıip kele jatqanyna alańdaýly. Qazaly otbasyna kóńil aıtqaly barǵan qarapaıym jurt Qazaqstanda ólim jazasyna maratorıı jarıalanýyna baılanysty dál osyndaı adam tózgisiz qylmystardyń jıilep ketkendigin aıtady.

Bizdiń jýrnalıser qaýymynan kelgenimizdi bilgen jurt qanisherlerdiń qatań jazalanýyn surap, eger tıisti jazasyn almasa el bolyp qylmystylardan qandy kegin alatyndyqtaryn aıtyp otyr. Qarshadaı sábılerdiń jazyqsyz ólimi kim-kimniń de júregin qan jylatady.

Etekteri jasqa tolǵan marqumdardyń týystary Qazaqstan Respýblıkasynyń ishki ister mınıstri Qalmuhambet Qasymovtiń bul oqıǵaǵa tikeleı nazar aýdarýyn jáne bolashaqta osyndaı qandy qylmystardyń bolýyn azaıtý úshin Qazaqstanda ólim jazasynyń qalpyna keltirilýin  suraıdy. Mundaı pikirdi sonda jınalǵan qara orman halyq quptap otyr.

Aıdyń-kúnniń amanynda erteń el tizginin ustaıtyn Sylamnur, Syrmuhammet sıaqty sábılerimizdi ómirdiń esigin ashpaı jatyp, qanypezelerdiń qurbanyna aınaldyrsaq eldiń erteńi ne bolmaq?!

Eger, osy betimizben kete bersek, kez kelgen qazaqtyń otbasynda osyndaı qulaq estimes oqıǵanyń oryn almasyna kim kepil? Qasıetti Qurannyń ózinde bireýdiń murynyn kesken adamnyń murynyn kesý kerektigin, esh jazyqsyz bireýdi óltirgen adamdy óltirý kerektigi aıtylǵan. Sondyqtan adam ólimine qatysty jurttyń jaǵasyn ustatqan osyndaı qylmystarǵa, ar-uıattan jurdaı bolǵan qylmyskerlerge eshqandaı aıaýsyz jaza berý kerek. Ol jaza – ólim!

Erteń, ıaǵnı maýsymnyń 13-y kúni saǵat 10.00-de Maqataev kóshesi men Qonaev kósheleriniń qıylysynda marqumdardyń jerleý rásimi ótedi.

qamshy.kz