Aıtys shymyldyǵyn Batys Qazaqstan oblysynyń ákimi Ǵalı Esqalıev pen «Nur Otan» partıasynyń hatshysy Ǵabıdolla Ospanqulov ashyp berdi.

«Aq Jaıyqta alǵash ótkeli turǵan «Altyn dombyra» aqyndar aıtysynyń ashylýymen quttyqtaımyn. Tarıhy mol, tabıǵaty kórkem Aq Jaıyqqa qosh keldińizder. Aıtys - babalar amanaty. Aqyndarǵa shalqar tabys tileımin», - dedi oblys ákimi Ǵalı Esqalıev.

Odan keıin sóz alǵan «Nur Otan» partıasynyń hatshysy Ǵabıdolla Ospanqulov elimizdiń jer-jerinde partıa qoldaýymen ótkizilip jatqan aıtystardyń mańyzyna toqtaldy.

«Nur Otan» partıasynyń tóraǵasy Nursultan Nazarbaev IýNESKO-nyń materıaldyq emes mádenı muralar tizimine engen aıtys ónerine qoldaý kórsetýdi tapsyrdy. Táýelsizdigimiz máńgi bolyp, aıtystyń tuǵyry bıikteı bersin»,- dedi Ǵabıdolla Ospanqulov.

Jyr dodasyn aqyn, Halyqaralyq aıtys aqyndary men jyrshy-termeshiler odaǵynyń tóraǵasy Júrsin Erman júrgizdi.

Aıta keteıik, «Nur Otan» qoldaýymen sońǵy 4 aıdyń ishinde Atyraý, Qaraǵandy, Qostanaı, Almaty jáne Nur-Sultan qalalarynda aıtystar ótken bolatyn. Táýelsizdik kúnine oraı Oral qalasynda ótip jatqan bul «Altyn dombyra» respýblıkalyq aqyndar aıtysy bıylǵy jyly «Nur Otan» partıasynyń qoldaýymen eldiń óńirlerinde uıymdastyrylǵan aıtystardy qorytyndylamaq.

Partıa aıtys ótkizýdi bıylmen ǵana shektemeı, bul úrdis kelesi jyly ǵulama ǵalym Ábý nasyr ál-Farabıdiń 1150 jyldyǵy men Abaıdyń 175 jyldyǵyna oraı ótkiziletin alaman aıtystarǵa ulaspaq.

Osymen segizinshi ret uıymdastyrylyp otyrǵan «Altyn dombyra» aıtysyna jyl boıy ótken dodalarda jeńimpaz bolǵan 20 aqyn qatysýda. Olardyń qatarynda Jandarbek Bulǵaqov, Ásem Erejeqyzy, Bekzat Asqarov, Arýna Kerimbek, Rústem Qaıyrtaı, Shuǵaıyp Sezimhan, Qanat Myrzahan, Haziret Berdihan, Muhtar Nıazov, Aıbek Qalıev Aspanbek Shuǵataev, Shalqarbaı İzbasarov, Dıdar Qamıev, Ómirjan Kópbosynov, Serik Qusanbaev, Juldyzaı Maratbekqyzy, Birjan Baıtýov, Jansaıa Mýsına, Talǵat Myqı, Baýyrjan Shırmedınuly syndy aıtyskerler bar.