16 jeltoqsanda Almaty men Nur-Sultan qalasynda ruqsat etilmegen sherý ótkizbek boldy degen kúdikpen 55 adam ustalǵan. Bul týraly Qazaqstan ishki ister mınıstrliginiń baspasóz qyzmeti habarlady.

Mınıstrliktiń habarlaýynsha, bas prokýratýranyń eskertýine qaramastan, Nur-Sultan men Almaty qalalarynda azamattar zańsyz shara ótkizgen.

"Bas prokýratýranyń eskertýine qaramastan, keı azamattar arandatýshylyqqa ushyrap, zańsyz aksıalarǵa qatysty. Nur-Sultanda ondaǵan azamat Respýblıka dańǵyly men Abaı kóshesiniń qıylysynda jınalyp, ruqsat etilmegen mıtıń ótkizdi. Almatyda osyǵan uqsas ruqsat etilmegen mıtıń Qazaqstan Táýelsizdigi monýmentiniń janynda ótti" delingen mınıstrlik taratqan habarlamada.

Vedomstvonyń málimdeýinshe, zańsyz sharalarǵa qatysqandar mereke kúni azamattardyń tynyshtyǵy men demalysyn buzǵan.

"Jergilikti atqarýshy organdardyń mıtıńiler ótkizý úshin zańdy negizderdiń joqtyǵy týraly eskertýlerine qaramastan, jınalǵandar Nur-Sultan jáne Almaty qalasy kóshelerindegi sherýdi jalǵastyrdy. Osylaısha, olar mereke kúni azamattardyń tynyshtyǵy men demalysyn buzdy. Qatysýshylar bılik organdarynyń zańsyz áreketterdi toqtatý týraly talaptaryn oryndamaǵandyqtan, Nur-Sultan qalasynda 32 adam, Almaty qalasyna 23 adam polısıaǵa jetkizildi. Olarmen profılaktıkalyq áńgimelesý júrgiziledi jáne ákimshilik jaýapkershilikke tartý máselesi qaralýda" dep habarlady İİM.

Keshe, 16 jeltoqsanda Qazaqstannyń birneshe qalasynda 1986 jylǵy Jeltoqsan oqıǵasy men 2011 jylǵy Jańaózen oqıǵalarynda qurban bolǵan azamattardy eske alyp, rýhtaryna quran baǵyshtaǵan. Sol kúni tústen keıin Almaty men Nur-Sultanda jınalǵandar qala kóshelerinde "Shal, ket!" degen uranmen sherýletti. Polısıa sherýge qatysqan azamattardy jappaı ustady.