Qazaqstan prezıdenti Qasym-Jomart Toqaev úkimetke Almaty qalasy men Almaty oblysy ákimdikterimen birlesip qaza bolǵan azamattardyń otbasylaryna 4 mıllıon teńge kóleminde materıaldyq kómek kórsetýdi tapsyrdy. Bul týraly Aqordanyń resmı saıty habarlady. 

Aqordanyń jazýynsha, Toqaev mundaı tapsyrmany ushaq apatyna baılanysty Aqordada ótkizgen shuǵyl keńeste bergen.

Sonymen qatar Toqaev qaıtys bolǵandardyń jaqyndaryna jan-jaqty psıhologıalyq jáne medısınalyq qoldaý kórsetiletinin aıtqan. 

Buǵan deıin Toqaev Almatydaǵy ushaq aptyna baılanysty 28 jeltoqsandy jalpyulttyq aza tutý kúni dep jarıalaǵan bolatyn. Prezıdent shuǵyl keńeste soǵan baılanysty erteń eldegi memlekettik týlardy tómen túsirýge jáne barlyq oıyn-saýyq sharalaryn toqtatýǵa tapsyrma berdi.

Búgin, 27 jeltoqsan kúni tańerteń Almaty áýejaıy mańyna Bek Air áýe kompanıasynyń Fokker-100 ushaǵy qulady. Almaty áýejaıy baspasóz qyzmetiniń habarlaýynsha, ushaqta 93 jolaýshy men bes ekıpaj múshesi bolǵan. Resmı oryndardyń deregin negizge alǵan birqatar BAQ bastapqyda 15 adamnyń qaza tapqanyn habarlaǵan edi. Keıinirek premer-mınıstrdiń orynbasary Roman Sklár ushaq apatynan 12 adamnyń qaza bolǵanyn málimdedi. Olardyń arasynda ekıpaj komandıri Marat Muratov ta bar.