Búgin, 27 jeltoqsanda Almaty áýejaıyna jaqyn Qyzyltý aýylynyń mańynda Bek Air áýekompanıasynyń Fokker-100 ushaǵy apatqa ushyrady. Almaty áýejaıy baspasóz qyzmetiniń dereginshe, ushaqta 93 jolaýshy men bes ekıpaj múshesi bolǵan. İshki ister mınıstrligi habarlaǵan sońǵy málimet boıynsha, apattan barlyǵy 12 adam qaza bolǵan. Olardyń arasynda 58 jastaǵy ekıpaj kapıtany Marat Muratbaev bar. 

Ushaq apatyna baılanysty Almaty áýejaıynda ótken baspasóz jıynynda Qazaqstan premer-mınıstriniń orynbasary Roman Sklár "Fokker-100  ushaǵynyń artqy bóligi ushyp-qoný jolaǵyna eki ret tıgen. Ushaq sodan keıin oń jaqa qaraı burylǵan. Ol kezde shası (ushaq dóńgelegi - red.) jınalyp qoıǵan. Ushaq ushyp ketpek bolǵanymen oń jaqqa aýyp ketip, jeke úıdiń qorshaýyna soǵylǵan" dep málimdedi. Sklár ushaqtyń "tehnıkalyq aqaýdan nemese ushqysh qateliginen qulaǵan bolýy múmkin" dep aıtty. Ol munyń aldyn ala boljam ekenin eskertti.

Qazaqstanda buǵan deıin de ondaǵan áýe apaty bolǵan. Qamshy.kz aqparat agenttiginiń tilshisi solardyń eń irisin nazarlaryńyzǵa usynady. 

2012 jyly jeltoqsannyń 25-i kúni Shymkent qalasynyń áýejaıynan 20 shaqyrym jerde Astanadan (qazirgi Nur-Sultannan) Shymkentke bet alǵan "An-72" ushaǵy qulady. Bul ushaq Qazaqstan ulttyq qaýipsizdik komıteti Shekara qyzmetine tıesili bolatyn.  Ushaq bortynda jeti ekıpaj múshesi men 20 áskerı qyzmetker boldy. Olardyń arasynda sol kezdegi UQK Shekara qyzmetiniń dırektory, polkovnık  Turǵanbek Stambekov pen onyń áıeli de bar. Ushaqta bolǵan adamdardyń barlyǵy apat bolǵan jerde qaza tapty. 

2013 jyly qańtardyń 29-y kúni Almaty áýejaıyna jaqyn Qyzyltý aýylynyń tusyna "Kókshetaý-Almaty" baǵyty boıynsha ushyp kele jatqan SCAT áýekompanıasynyń "Challenger-200" ushaǵy qulap, 21 adam qaza tapty. Olardyń  beseýi ekıpaj múshesi, 16-y jolaýshy bolǵan. Apattan ushaq bortynda bolǵan eshbir adam tiri qalmady. 

2015 jyly 20 qańtarda ushaq apaty Jambyl oblysynda boldy. Balqashtan Shatyrkól kenishine ushyp bara jatqan "Olımp Eır" áýe kompanıasyna tıesili "An-2" ushaǵy Jambyl oblysynyń Shý aýdany aýmaǵynda qulady. Ushaqta tórt qyzmetker men úsh ekıpaj múshesi boldy. Olardyń arasynan "Balhashsvetmet" kompanıasynyń bas geology Ásem Shaıahmetova ǵan tiri qaldy. Al "Qazaqmys" kompanıasynyń úsh qyzmetkeri men ekıpajdyń úsh múshesi qaza tapty. 

2016 jyly qańtardyń 27-i kúni "Aspan" áýe kompanıasynyń "UP-MD 600-N" " tikushaǵy Alakól aýdanynyń Úsharal qalasynan naýqastanyp qalǵan sábıdi oblystyq aýrýhanaǵa jetkizýi maqsatynda Taldyqorǵanǵa qaraı ushyp shyǵyp, keıin radardan joǵalyp ketti. Kelesi kúni ushaqtyń apatqa ushyrǵany belegili boldy. Tikushaq bortynda ushqysh, eki dáriger jáne bala men ana bolǵan. Olardyń beseýi de qaza tapty. 

2016 jyly 27 maýsymda Almaty oblysyndaǵy Bereke aýylynyń mańyna "Tamshybulaq" JSHS-ǵa tıesili "AN-2" ushaǵy apatty jaǵdaıda qondy. Sonyń saldarynan bortta bolǵan eki adamnyń bireý qaza tapty.

2017 jyly 10 tamyzda Almatydan 43 kılometr qashyqtyqtaǵy "Azem" aırodromynda oqý-jattyǵý tapsyrmasyn oryndaý maqsatynda áýege kóterilgen azamattyq avıasıa akademıasyna tıesili "Tespam-P 2002" ushaǵy   qulady. Apat saldarynan ushqysh-nusqaýshy jáne kýrsant qaza tapty.   

2017 jyly 27 shilde Almaty oblysynyń Jarkent qalasynan soltústikke qaraı 10 shaqyrym jerde júgeri alqaptaryna zıankesterden qorǵaıtyn dári-dármek sebý úshin áýege kóterilgen "KAZAVIA" avıakompanıasynyń "IaK-12" tikushaǵy qulap, janyp ketti. Bortta bolǵan eki adam - ushqysh Hamıt Aqbergenov pen "Arshıdınov" sharýa qojalyǵynyń basshysy Másimjan Másimov qaza boldy.  

2017 jyly 3 qazanda Almatyda East Wing avıkompanıasynyń "An-28" ushaǵy qulap, janyp ketti. Bul ushaq "Almaty – Shymkent" baǵyty boıynsha ushqan. Bortta bolǵan bes adamnyń barlyǵy qaza tapty.