Elimizdiń Premer-Mınıstriniń orynbasary Berdibek Saparbaev  Jambyl oblysynda ótetin Qazaq handyǵynyń 550 jyldyǵynyń daıyndyǵyn pysyqtap qaıtty. Bul týraly «Qamshy» portaly Kárim Másimovtiń resmı saıtyna silteme jasaı otyryp habarlaıdy.

Tarazda vıse-premer «Qazaq handyǵy» monýmentin ornatatyn jerge baryp, eskertkishtiń ornalasýynyń sulbasymen tanysty. 

Odan keıin B.Saparbaev elimizdiń basqa óńirleri salyp jatqan nemese jóneýden ótkizip jatqan nysandardy aralady. Atap aıtqanda, kirý arkasyn jóndeý jáne eki barelefti salý barysyn tekserdi. Jumystar Ońtústik Qazaqstan oblysynda júrgizilip jatyr. 

Sondaı-aq, ol Táýke han kóshesindegi (Pavlodar oblysy) jáne Jambyl dańǵylyndaǵy (Aqtóbe oblysy) kópirlerdi jóndeý, tuńǵysh Prezıdent saıabaǵy janyndaǵy (Atyraý oblysy), «Taraz» qonaq úıiniń aldyndaǵy (Mańǵystaý oblysy), avtovokzal janyndaǵy (Soltústik Qazaqstan oblysy) gúlzarlardy abattandyrý barysymen tanysty.

Sosyn B.Saparbaev drama teatry ǵımaratyndaǵy jóndeý jumystary, «Dańq aleıasy» qurylysy, Qarahan baba mavzoleıi janyndaǵy gúlzardy abattandyrý barysyn qarap shyqty (Qyzylorda jáne Qostanaı oblystary). 

«Kóne Taraz» tarıhı-mádenı ortalyǵynda ol arheoloıalyq jáne restavrasıa jumystary, mýzeı, etnoortalyq, «Taraz sazdary» stellasy qurylysy, «Myńbulaq» gúlzaryn abattandyrý barysymen tanysty (Batys Qazaqstan oblysy jáne Almaty qalasy).

TarMÝ-de B.Saparbaev oblys ákimderiniń orynbasarlarymen, aýdan ákimderimen, basqarma, aýmaqtyq departament, oqý oryndary, kásiporyndar men bıznes qurylymdar basshylarymen Qazaq handyǵynyń qurylýynyń 550-jyldyǵyn merekeleýge daıyndyq máseleleri boıynsha keńes ótkizdi. 

«Memleket basshysy Qazaq handyǵynyń mereıtoıyn merekeleýge ortalyq, sondaı-aq óńirlik deńgeıde ýaqytyly daıyndalýdy tapsyrdy. Atalǵan is-sharany jastardy patrıottyq tárbıeleý jáne memlekettilikti nyǵaıtý rýhymen ótkizý mańyzdy», - dedi B.Saparbaev.