Bul týraly "Qozǵalys KZ" jastar qoǵamdyq qozǵalysynyń tóraǵasy Aslan Kabagenov óziniń facebook-taǵy paraqshasynda habarlady.

"Dostyq úıinde qalalyq halyq tyńdalymy ótti. Bul jıynda qarastyrylǵan másele – Qaraǵandy qalasyndaǵy 10 kósheniń ataýyn aýystyrý týraly, onyń ishinde, qazaq halqynyń mańdaıyna bitken birtýar tulǵalary – Abaı Qunanbaıuly, Qasym Amanjolov, Aleksandr Zataevıch, Qazybek Nurjanov, t.b. ataýlarymen ózgertildi. "Jumyla kótergen júk jeńil" demekshi, qoǵamnyń atynan bir aýyz sheshim qabyldandy. Bul tyńdalym Qaraǵandy qalalyq máslıhatynyń hatshysy – Qudaıbergen Beksultanuly Beksultanovtyń tóraǵalyǵymen ótti. Kóshe ataýlaryn aýystyrýdaǵy basty maqsat – elimizdiń tarıhy, mádenıeti, ádebıeti jaǵynan damytýǵa úles qosqan uly tulǵalardy dáripteý, sonymen qatar jastardyń, bolashaq urpaqtyń týǵan jerin, týyp-ósken ólkesin nasıhattap, Otanymen maqtan tutýǵa, óz eliniń tarıhı jerlerin únemi este saqtap júrýge tárbıleý bolyp tabylady. Eń bastysy – uly aqyn, fılosof, qazaq ádebıetiniń paıǵambary Abaı Qunanbaıulynyń atyna kóshe ataýyn berý – ultymyzdyń rýhyn arttyrady degen senimdemiz. Tyńdalymnyń sońy Abaı atamyzdyń "Kózimniń qarasy" ánin tebirenispen aıtqan halyqtyń patrıottyq seziminiń artýyna úlken septigin tıgizýimen aıaqtaldy" delingen jazbada.

Jıynǵa qatysqan jergilikti kásipker Erjan Áshimov "kásipker retinde qanshama qarajatty salyqqa tólep otyrǵan adammyn, eger qajet bolsa osy kóshe ataýlaryna ketetin qarajatty men tólep bereıin", dep usynys tastaǵan.