Fýtboldan Túrkıa quramasynyń burynǵy oıynshysy, 2002 jylǵy álem chempıonatynyń qola júldegeri Hakan Shúkir Túrkıa úkimetimen bolǵan kelispeýshiliktiń kesirinen jumyssyz qalyp, AQSH astanasy Vashıngtonda taksı júrgizip júr.
Eurosport.ru saıtynyń jazýynsha, eks-fýtbolshynyń banktegi shottary buǵattalǵan. Álem chemponatyndaǵy eń jyldam goldyń avtoryna qysym onyń saıası kózqarasy úshin jasalǵan.
Hakan Shúkir birneshe jyl buryn prezıdent Erdoǵannyń partıasyna kirgen. Alaıda partıadaǵy jemqorlyq pen jumysty júrgizý tásili unamaǵandyqtan odan shyǵyp ketken.
Osydan keıin eks-fýtbolshy otanynda qysym kóre bastaǵan. Banktegi shottary buǵattalǵan. Bılik tarapynan teperish toqtamaǵan soń ol 2015 jyly otbasymen AQSH-qa kóship ketýge májbúr bolǵan.
2016 jyly Hakan Shúkir memlekettik tóńkeris jasamaq bolǵandarǵa qatysy bar dep aıyptaldy. Oǵan halyqaralyq izdeý jarıalanyp, ákesi túrmege qamaldy. Alaıda ákesi qaterli isikke shaldyqqandyqtan, uzamaı bostandyqqa shyǵaryldy.
Túrkıa bıligi fýtbolshyǵa AQSH-ta da tynyshtyq bermegen. Óziniń sózinshe, páterin jalǵa bereıin dese, jalǵa alýshylarǵa tıise me dep qaýiptenedi. AQSH-ta ashqan kafesin belgisiz bireýler búldirgennen keıin amalsyz japqan.
"Meniń jumys isteýimniń sebebi – mende eshteńe qalmady. Erdoǵan menen bostandyǵymnan bastap, oı erkindigin, eńbek etý quqyǵymdy alyp qoıdy. Olar meniń áıelimniń dúkenine tas laqtyrdy, meniń balalaryma kóshede qoqan-loqqy jasaldy, men árbir jasaǵan úndeýimnen keıin qorqytý-úrkitý áreketterine tap boldym. Men elden ketkende olar ákemdi tutqyndady. Osy ýaqytqa deıin jınaǵan bar dúnıe-múlkimdi tárkiledi. Bul meniń otbasyma aýyr soqty. Meniń aınalamdaǵy barlyq adamdar qarjydan tarshylyq kórip keledi" - deıdi Hakan "Rekord" basylymyna bergen suhbatynda.
"Bosfor buqasy" laqap atymen tanymal eks-fýtbolshy "Galatasaraı", "Inter" jáne "Parma" klýbtarynda oınaǵan. Túrkıa quramasy sapynda 100-den astam oıyn ótkizgen. 2002 jylǵy álem chempıonatynda qola júldeger atanǵan. Sol jarystaǵy úshinshi oryn úshin bolǵan oıynda Koreıa quramasynyń qaqpasyna 11 sekýndta gol soǵyp, chempıonattaǵy eń jyldam gol ıesi atanǵan.
Pikir qaldyrý