Keshe, 14 qańtarda Almatydaǵy LA-155/18 tergeý ızolátorynda 19 jastaǵy Erkebulan Nurmyhanov esimdi tutqyn jumbaq jaǵdaıda kóz jumdy, dep jazady Qamshy.kz aqparat agenttigi Ratel.kz saıtyna silteme jasap.

Tergeý ızolátory dárigerleriniń sózinshe, Nurmyhanovtyń dene qyzýy kóterilip, oǵan analgın jáne dımedroldan ýkol salynǵan. Ýkoldan keıin tutqynnyń jaǵdaıy tipti múshkildengen, jedel járdem kelgenge deıin ólip ketken.

Ratel.kz saıtynyń jazýynsha, týystary tergeý ızolátory ókilderiniń sózine kúmán keltiredi. Olardyń aıtýynsha, Nurmyhanovtyń dárige alergıasy bolmaǵan. Máıitti taný úshin máıithanaǵa barǵan kezde olar Nurmyhanovtyń denesiniń oń jaǵy, beti men basy da kókpeńbek daqtarǵa tolyp ketkenin baıqaǵan. Iyǵynan jaraǵa uqsas iz bilingen.

Saıttyń jazýynsha, sot-medısınalyq saraptama jasalǵannan keıin sarapshylar máıittiń denesindegi daqtar soqqynyń nátıjesi me, joq pa, sony anyqtaýy tıis.

Nurmyhanov tergeýshi qaýlysymen 14 qarashada eki aıǵa qamaýǵa alynǵan. 14 qańtarda túrmede otyrý merzimi bitýi tıis bolǵan. Alaıda dál sol kúni tergeý ızolátorynyń ókilderi Nurmyhanovtyń týystaryna habarlasyp, tutqynnyń máıitin alyp ketý qajettigin aıtqan.

Nurmyhanov turmystyq sıpattaǵy oqıǵaǵa baılanysty qamaýǵa alynǵan, biraq polısıa buzaqylyq boıynsha is qozǵaǵan.