Tekseris qorytyndysy boıynsha, ushaqtardyń qozǵaltqyshynan maı aqqany, áınekterdiń qatparlanýy, konstrýksıany qorǵaý úshin skoch qoldanylǵany jáne dóńgelekterdiń tozǵany anyqtaldy dep habarlaıdy Qamshy.kz aqparat agenttigi Tengrinews.kz saıty deregine  súıene otyryp.

Naqtyraq aıtqanda, áýe kemelerin teksergennen keıingi brıtanıalyq ınspektorlar shyǵarǵan qorytyndy men sýretterin Qazaqstan avıasıalyq ákimshiliginiń ushý qaýipsizdigi departamentiniń basshysy Lında Orledı brıfıńte tanystyrǵan.

"Ushaqtyń aldyńǵy jaǵy zaqymdanǵan. Másele onyń artynda radardyń turǵanynda. Áýe kemesiniń bortynda ornatylǵan radardyń durys jumys isteýi úshin jaǵdaıdyń jasalýy óte mańyzdy", - dep túsindirdi ol. "Eki qozǵaltqyshta da ıdentıfıkasıalyq taqtaıshalar joq. Bul óte mańyzdy eskertý. Olar mindetti túrde bolýy kerek. Bek Air ushaqtarynyń 50 paıyzynda eki qozǵaltqyshta da ıdentıfıkasıalyq taqtaıshalar joq. Bul óte qaýipti belgi", - dedi Orledı.

"Munda maıdyń aqqany kórinedi. Men, ushqysh retinde, óz áýe kememde mundaıdy kórgim kelmeıdi. Sondaı-aq, tehnıkalyq qyzmet kórsetý jónindegi ınjener ondaıdy baıqasa, keıin qaı kúni, qansha suıyqtyq joǵalǵanyn qadaǵalaý mańyzdy. Biz maıdyń aqqany tirkelgen birde-bir tizilimdi taba almadyq. Inspektorlar árbir Bek Air ushaǵynyń astynan osyndaı kemshilikter tapty", - dedi Orledı.

 Mamannyń aıtýynsha, barlyq ushaqqa metal skoch jabystyrylǵan. Áýe kemesinde skoch qoldanýǵa bolady, biraq bul arnaıy skoch bolýy tıis jáne ony paıdalaný deregi jazbasha bekitilýi kerek. Ol boıynsha eshqandaı qujat tabylmaǵan.

"Ushqyshtar kabınasy kóp qabatty áınekpen qorǵalýy tıis. Munda pılottar kabınasynyń sol terezeniń áınegi qatparlanyp ketkenin kóresiz", - deıdi Qazaqstan avıasıalyq ákimshiliginiń ushý qaýipsizdigi departamentiniń basshysy.

Sonymen birge, Bek Air ushaqtarynyń júk salatyn jerindegi panelderde órtke qarsy taspalary joq bolyp shyqqan. Bar degen jaǵdaıda da nashar ekeni anyqtalǵan. Sondaı-aq,  dóńgelekteri de tozǵan.