Keshe, 28 qańtarda áýe apatyna ushyraǵan Bek Air ushaǵynyń ekinshi ushqyshy Mirjan Moldaqulov qaıtys boldy. Bul týraly Almaty qalasy densaýlyq saqtaý basqarmasy habarlady.

Olardyń málimetinshe, ushqysh 21 qańtar kúni №4 qalalyq klınıkalyq aýrýhanadan turaqty jaǵdaıda úıine shyǵarylǵanyn.

"Ol aýrýhanada emdelý kezinde kardıolog, hırýrg, terapevt, psıhologtardyń qaraýynda boldy. 28 qańtar saǵat 18.00-de naýqas jaǵdaıynyń kúrt nasharlanǵany týraly qońyraý tústi. Jedel járdem der kezinde jetti. Júrek qyzmetin qalpyna keltirý úshin barlyq reanımasıalyq sharalar jasaldy, biraq bári sátsiz aıaqtaldy" delingen densaýlyq saqtaý basqarmasynyń habarlamasynda.

Buǵan deıin 5 qańtarda ushqysh esin jıyp, reanımasıadan mamandandyrylǵan bólimge aýystyrylǵany týraly habarlanǵan.

27 jeltoqsanda Almatydan Nur-Sultanǵa bet alǵan Bek Air áýe kompanıasynyń Fokker-100 ushaǵy tańǵy ýaqytta Almaty áýejaıynyń mańynda qulǵan edi. Bortta 93 jolaýshy jáne ekıpajdyń bes múshesi bolǵan. Apat saldarynan 12 adam qaza tapty. Olardyń arasynda laınerdiń bas ushqyshy Marat Muratbaev ta bar.