Túrkistan oblysynyń ákimi Ómirzaq Shókeev jáne Túrkistan qalasynyń ákimi Rashıd Aıýpovtyń halyqpen esep berý kezdesýi ótti. Jıynda aımaq basshysy oblys ortalyǵynyń áleýmettik-ekonomıkalyq damýyna oń baǵa berip, birqatar naqty tapsyrmalar júktedi.  Bul týraly Tengrinews habarlaıdy. 

– Birinshiden, Túrkistanǵa tarıhı mártebe berý – bul «Elbasy» jobasy ekenin este ustaýymyz kerek, sondyqtan tarıhı qalanyń sáýlettik kelbetin saqtaý úshin biz onyń damýynyń úsh negizgi baǵytyna toqtadyq. Úsh aımaqtyń biri – tarıhı-mádenı aımaq, ekinshisi – ákimshilik jáne iskerlik ortalyq, úshinshisi – eski qalany modernızasıalaý, – dedi Shúkeev. 

Aımaq basshysynyń aıtýynsha, Túrkistandy damytýdyń mańyzdy máseleleriniń biri – bul qala turǵyndaryn tabıǵı gaz jáne kárizben 100% qamtamasyz etý. Turǵyndardy kógildir otynmen qamtamasyz etý arqyly qalanyń ekologıalyq jaǵdaıyn jaqsartýǵa bolady. Ystyq jazda klımatty jaqsartý úshin qalada jasyl beldeý men sýlandyrýdy damytý qajet. 

Sondaı-aq jyl saıyn qalada turǵyn úıge suranystyń artyp kele jatqanyn atap ótti. 

– Biz turǵyn úılerdiń syrtqy kelbeti men sapasyna úlken mán beremiz, turǵyn úılerge komýnaldyq ınfraqurylymdy (abattandyrý, gaz, sý, káriz, elektr, jylý, baılanys jáne t.b.) jetkizý kerek. Basty maqsat – qalany ózgertý Túrkistan – bul turǵyndar men qonaqtar úshin yńǵaıly, qaýipsiz, taza jáne tartymdy ortalyq, – dedi ol.

Aıta ketý kerek, búginde ákimshilik-iskerlik ortalyqta jalpy aýdany 575,8 myń sharshy metr bolatyn 156 kóp páterli úı nemese 7459 páter salynýda. 2019 jyldyń sońynda 32 turǵyn úıdiń qurylysy aıaqtalyp, 1 701 páter paıdalanýǵa berildi. Sonymen qatar, ótken jyly qalada 100 kóshe tóselgen bolatyn, bıyl oblys ortalyǵynyń taǵy 100 kóshesiniń joldaryna asfált tóseletin bolady.