Bul týraly Qamshy.kz aqparat agenttigi  Skifnews.kz aqparat portalyna silteme jasap habarlaıdy.

Belgili bolǵandaı áýeli Marjan Raqaı esimdi jeli qoldanýshy facebook paraqshasyna Taraz qalasynyń ákiminen kómek suraı kelgen kópbalaly ata-ananyń vıdeosyn jarıalaǵan. 

«Qarıasyn qaramaı, qaldyryp, qańǵytyp ketken qazaqtar. 11 bala týyp, ósirip, qanattandyrǵan qarttar bul! «Biri ákim, biri prezıdent bolady dep, eshqaısysynyń betinen qaqpaı ósirdim», – dep egiledi keıýana. «Bireýine de qol kóterip, táıt demedim», – dep eziledi qarıa.

Osy rette, vıdeo avtory keleńsiz jáıitti kórip júregi julynyp keterdeı bolǵanyn aıtady:

"Bul ne sumdyq boldy, Allam-aı?! 11 balań bola tura, osy jasqa kelgende qaraýsyz qalǵan degen qandaı qorqynyshty, qandaı qasiret edi... Qazaq mundaı bolmasa kerek-ti... Kim bolyp kettik, qaıda baramyz? Osy qarttardyń kóz jasy, nalasy jibere me bizdi, kógerte me urpaǵyn? Birin-biri súıreleı, birin-biri demep, Taraz qalasynyń ákiminen kómek suraı kelipti. Qaıtsin endi?.. Kóz jasyn tyıa almaı otyrǵan kempiriniń betinen súrtip, «Jylamashy, janym! 18 jasynda qolyma qondyrǵan aqqýym ǵoı», – dep jubatyp qoıady ata. Keshirińizdershi bizdi. Biz sondaı tasbaýyr bolyp baramyz... Jániim apa-aı...» dep jazdy Marjan Raqaı.

Jazba astyna pikir qaldyrǵan kópshiliktiń ashý-yzaǵa toly sózderi tolastar emes. Qanattyǵa qaqtyrmaı, tumsyqtyǵa shoqtyrmaı ósirgen on bir balanyń opasyzdyǵy jeli qoldanýshylardyń jıirkenishin týǵyzdy.

Olardyń biri «Ókinishti, óte ókinishti! Sonda anaý ul-qyzdary qalaı el-jurttyń kózine qaraıdy eken? Qalaı myna qara jerdiń ústinde taban tilip júr eken?» dese, endi bireýleri «It eken balalary! Basqa sózim joq», «Alla-aı, balalarynyń óz bastaryna kelsin, sanasyzdar!», «Qatyndarynyń sońynan ketken-aý, súmelek uldary!», «Aıýan ul-qyzdardyń atyn atap, túsin tústep kórsetý kerek. Jekjat-juraǵaty tanyp, teris aınalýy úshin. Sonda jalǵyzdyqtyń dámin tatady. Basyna túspeıtindeı kórinetin shyǵar olarǵa. Qoǵam dertin osylaı qoǵam bop emdeý kerek» – dep jatyr.

Tipti, kelesi bir pikir ıesiniń «Bir ata-ana on balany baǵa alady, on bala jabylyp, bir ata-anany baǵa almaıdy. Eee, «Bir kem dúnıe» degen sózi jurt kókiregindegi oıdy dóp basqandaı.