Qytaıda 600-den astam adam koronavırýs qurbany boldy. Qytaıda vırýs juqtyrǵandardyń sany 28000-nan asqan. Bul Qytaıdyń densaýlyq saqtaý jónindegi memlekettik komıtetiniń búgingi málimetteri, dep habarlaıdy  Qamshy.kz  aqparat agenttigi  almaty.tv   -ge silteme jasap.

Dúnıejúzilik buqaralyq aqparat quraldary bul indetti alǵashqylardyń biri bolyp eskertken qytaı dárigeriniń qaıtys bolǵany týraly habarlady. Qytaı dárigeri Lı Venlán vırýstyń taralǵanyn alǵashqy bolyp eskertken edi, alaıda arada bir apta ótkende dárigerdiń ózi qaýipti indetti juqtyryp alǵan.

34 jastaǵy dáriger jeti adamnyń vırýsty juqtyryp alǵanyn bilgennen keıin, óz dostaryn saqtandyrmaqshy bolyp, olarǵa aldyn ala saqtyq sharalaryn eskertedi. Degenmen 12 qańtar kúni dárigerde vırýstyń belgileri baıqalady. Dárigerden alynǵan saraptama nátıjesi 1 aqpan kúni anyqtalyp, koronavırýsty juqtyrǵanyn kórsetedi.

Qazirgi tańda Qytaıda  10 mıllıon adam karantın jarıalanǵan aımaqta. Sonymen qatar, Ulybrıtanıa, Reseı jáne AQSH-ty qosqanda 20-dan astam elde vırýstyń taralǵany týraly málimet bar.

Qazaqstanda koronavırýs juqtyrǵan naýqastar tirkelmegen. Elimiz Qytaımen baılanystyń barlyq túrin toqtatty, avtostansıalar men áýejaılarda sanıtarlyq baqylaý kúsheıtildi. Dúnıejúzilik densaýlyq saqtaý uıymy bul indetti jahandyq qaýip dep tanydy jáne ony halyqaralyq deńgeıde tótenshe jaǵdaı dep jarıalady.