Bul týraly Qamshy.kz aqparat agenttigi QazTAG  saıtyna silteme jasap habarlaıdy.

UQK tóraǵasynyń orynbasary Nurǵalı Bilisbekov QazTAG tilshisine bergen jaýabynda olardyń osy ýaqytqa deıin shekarany zańsyz buzyp ótkeni úshin sottalǵanyn, basqa esh jaýapqa tartylmaǵanyn jetkizgen:

"Eger olardyń ekstremıstik is-áreketterge qatysy bar bolyp shyqsa, sóz joq, biz máseleni halyqaralyq zań men konvensıaǵa  sáıkes, zańmen bekitilgen tártip aıasynda sheshemiz. Eger olardyń qylmystyq iske qatysy rastalmasa, másele basqasha qaralady. Shekarany buzyp kelgen eki qazaq (Qaster Musahanuly men Murager Álimuly – red.) shekarany zańsyz buzyp ótkeni úshin ǵana sottaldy emes pe? Basqa esh jaýapqa tartylyp jatqan joq",  – degen Nurǵalı Bilisbekov.

Iá, UQK ókili dálme-dál "Halyqaralyq zań men konvensıaǵa sáıkes" deıdi. Halyqaralyq zań túsinikti deńiz, al konvensıa degen ne deseńiz, ony da túsindire keteıik.

UQK tóraǵasynyń orynbasary tilge tıek etken konvensıa 1951 jyly Jenevada qabyldanǵan, Qazaqstanda 1998 jyly ratıfıkasıalanǵan. Iaǵnı, bosqyn mártebesi jónindegi halyqaralyq konvensıaǵa nazar aýdarsańyz, ómirine qaýip tóngen kez kelgen azamatqa esh qıyndyqsyz bosqyn statýsy berilýi tıis. 

"Bosqyn mártebesi" demekshi, joǵarydaǵy adam quqyqtary jónindegi halyqaralyq qaǵıdaǵa saı, bosqyn mártebesi berilýi tıis Qaster Musaqanuly men Murager Álimuly osy ýaqytqa deıip sottalyp úlgergen edi. Naqtyraq aıtqanda, 21 qańtarda saıası tarıhı otanynan pana izdep, Qytaıdan qashyp ótken Qaster Musaqanuly men Murager Álimulyna Shyǵys Qazaqstan oblysynda úkim shyǵarylyp, bir jylǵa bas bostandyǵynan aıyrý jazasyna kesken.

Osylaısha, "shekarany zańsyz kesip ótti" degen aıyppen ustaǵan UQK endi olardyń ekstremıstik is-áreketterge qatysy bar-joǵyn anyqtaýy múmkin.