Ál-farabı atyndaǵy QazUÝ-dyń fılologıa jáne álem tilderi fakúltetindegi oqýlarynan shyǵarylǵan 2-kýrstyń 10 stýdenti men olardyń ata-analary narazylyq aksıasyn uıymdastyrdy.

Stýdentterdiń oqýdan shyǵarylýyna 1 jáne 2-kýrs stýdentteri arasyndaǵy kelispeýshilik sebep bolǵan. 1-kýrs stýdentteri 2-kýrs shákirtterine aryz jazǵannan keıin 10 stýdent avtomatty túrde oqýdan shettetilgen.

Qamshy tilshisi atalǵan jaıt týraly ýnıversıtettiń baspasóz hatshysy men fakúltet basshylyǵynan pikir almaq bolyp edi, fakúltet dekanynyń orynbasary Nurlan Berikbaıuly dekannyń ruqsatynsyz eshqandaı aqparat bere almaıtynyn aıtty. Ýnıversıtettiń baspasóz qyzmeti de jýrnalıs suraqtaryna jaýap berýden bas tartty. 

Aty-jónin atamaýdy suraǵan fılologıa fakúltetiniń oqytýshysy basshylyq "máseleni sheshýdiń basqa jolyn qarastyrmady" deıdi.

– Stýdentterin tárbıeleýdi óz ýaqytynda, júıeli, mazmundy júrgizbegen.  Osy ýaqytqa deıin jastardyń arasyna baryp, qarym-qatynasty rettemegen, qadaǵalamaǵan, til tabyspaǵan QazUÝ-dyń tárbıe bóliminiń basshylary stýdentter arasynda problema týyndaǵan kezde pedagogıkalyq-psıhologıalyq turǵydan zerttep, salıqaly túrde sheshpeı, birden 10 birdeı stýdentti oqýdan shyǵaryp jiberdi. Budan bólek áli sanasy tolyq qalyptaspaǵan, stresske shydamsyz, tájirıbesiz jastardy «jeldiń ótine» laqtyryp, ózderin aqtap alyp otyr. Buıryq shyǵarýǵa asyqqan basshylyq óz stýdentterinen osyndaı ońaı jolmen qutylyp, bul máseleni sheshýdiń basqa jolyn qarastyrmaǵan, – dedi óziniń aty-jónin atamaýdy suraǵan fılologıa fakúltetiniń oqytýshysy.

Sherýge shyqqan ata-analardyń aıtýynsha, fakúltet basshylyǵy stýdentterdi oqýdan shyǵarylý sebebin, jaǵdaıdyń barysyn túsindirmegen. Sondaı-aq oqýdan shyǵarylǵan stýdentterge eshkim shaǵymdanbaǵan.

– "Álimjettik jasady" degen 2-kýrs stýdentteri óz kinásin moıyndamaıdy, "taıaq jedi" degen 1-kýrs stýdentteri shaǵymdanbaǵan. Tártip saqshylarynyń qolyndaǵy beınejazbany negiz etip alǵan fakúltet basshylyǵy jastardy nege dıalogqa shaqyrmaǵan? Ne sebepti anyq-qanyǵyn bilip, tek kinálilerdi ǵana jazalamaǵan? Nege jataqhanadan shyǵaryp, shákirtaqydan aıyryp, qatań eskertý bermeske?, – deıdi sherýge shyqqan ata-analardyń biri.

Sherýge shyqqan stýdentter fakúltet dekany Ómirhan Ábdımanulynan oqýdan shyǵarylýlarynyń sebebin suraǵanda, dekan durystap jaýap bermesten, ata-anany julqylap, uryp, "Sen degen ottama" dep dóreki sózden aıtqan.

Oqýdan shyǵarylǵan stýdentterdiń biri fakúltet basshylyǵy "bizge jala jaýyp otyr" degendi aıtty.

– 500 stýdenttiń árqaısysy biz úshin ótinish jazyp otyr. Men 10 balanyń ishinde zardap shegýshiniń birimin. Bizge ártúrli jalalar jabylyp jatyr. Bárimiz grantta oqımyz jáne ýnıversıtet uıymdarynyń belsendi jastarymyz. Biz  oqý úshin QazUÝ-ǵa arman qýyp keldik. Al fakúltet basshylyǵy búırekten sıraq shyǵaryp otyr. Osy ýaqytqa deıin 10 stýdenttiń biri de jazǵy oqýǵa qalyp nemese sesıadan qulap kórmegen. Muǵalimderimiz de qoldap otyr. Osynshama stýdentke jala jaýyp otyrǵanda, QazUÝ-dyń reıtıń boıynsha 227-orynda turǵany kimge kerek?, – dedi oqýdan shyǵarylǵan stýdent.