20-dan astam volonterlar uıymdarynyń ókilderi qatysqan kezdesýdiń basty maqsaty – memleket basshysy Volonter jyly dep jarıalaǵan bıylǵy jyly atqarylatyn jumystardyń jospary boıynsha «saǵatty salystyrý».

Almaty ákimi Baqytjan Saǵyntaev atap ótkendeı, izgi nıetti qalalyqtar ómir súrýdiń barlyq salalarynda belsendi jáne qala qaýymdastyǵynyń ajyramas bóligine aınalǵan.

Kezdesý kezinde aıtylǵan usynystar – meıirimdiliktiń qalalyq sherýin, ekologıalyq júgirýdi uıymdastyrý, qalany jasyldandyrýǵa qatysý, turǵyndarǵa quqyqtyq kómek kórsetý jáne oqýshylardyń zańnamalyq saýattylyǵy boıynsha sabaqtar ótkizý. Az qamtylǵandarǵa, jalǵyz basty qart adamdarǵa jáne erekshe qajettilikti talap etetin balalarǵa kómek kórsetiledi. Sonymen qatar, volonterlar donorlyqty qoldaıdy ári alǵashqy medısınalyq kómek kórsetýdiń negizderin úıretedi. Qaldyqtardy jeke jınaý, haıýanattardy qorǵaý men saqtaý máseleleri de mańyzdy.

Qala ákimi B. Saǵyntaev volonterlyq jobalardyń barlyǵynyń qoldaý tabatyndyǵyn aıtty.

– Volonterlyq qozǵalys salıqaly áleýmettik-jaýapty iske aınalýda. Sondyqtan volonterlar toptaryn daıyndaý, biryńǵaı aqparattyq bazany qurý mańyzdy. Kúsh-jigerimiz ben resýrstardy biriktire otyryp, biz bul mindetterdiń barlyǵyn sheshemiz. Osy maqsat úshin volonterlar men qoǵamnyń ózara is-qımylynyń tıimdi alańyna aınalatyn Volonterlar úıin ashamyz, – dep qorytyndylady sózin Almaty ákimi Baqytjan Saǵyntaev.

Kezdesýde «Qazaqstan volonterlar lıgasy» QQ-nyń tóraıymy Aısulý Ernıazova, «Meıirimdiler klýby» jobasynyń úılestirýshisi Dınara Asanova, Lider.kz QQ-nyń úılestirýshisi Dılmıra Blas, «Qýanysh syılaımyzdyń» úılestirýshisi Kıra Ýdarseva jáne basqalary óz usynystarymen bólisti.