Qytaıda paıda bolǵan koronavırýstyń jańa ınfeksıasy resmı túrde "COVID-19" dep ataldy. Bul týraly dúnıejúzilik densaýlyq saqtaý uıymy (DDSU) habarlady. 

– Dúnıejúzilik densaýlyq saqtaý uıymy koronavırýsynan týyndaǵan aýrýdy resmı túrde “COVID-19” dep atady. Bul sońǵy birneshe aptada paıda bolǵan osy aýrýǵa beriletin ártúrli ataýlar men heshtegterdi almastyrady. Jaqynda, 8 aqpanda Qytaı ulttyq densaýlyq saqtaý komısıasy aýrýdy ýaqytsha koronavırýstyq pnevmonıa nemese "NCP" dep ataýǵa sheshim qabyldady. Biraq vırýstar janýarlardan adamdarǵa taralǵandyqtan, bul koronavırýstyń taralý merzimi uzaqqa sozylmaıdy, – dedi bıomedısına ǵylymı zertteý ortalyǵynyń dırektory Álibek Ydyrysuly.

Shveısarıadaǵy dúnıejúzilik densaýlyq saqtaý uıymynyń bas ǵalymy Sýmá Svamınatannyń aıtýynsha, "COVID-19" (coronavirus disease in 2019) "2019 jylǵy koronavırýs aýrýy" degendi bildiredi. Sonymen qatar kóptegen koronavırýstar bar jáne ataýdyń bul stıli bolashaqta jańa koronavırýstyq aýrýlardy anyqtaýǵa múmkindik beredi. Vırýstyń ózin vırýsologıanyń taksonomıamen aınalysatyn halyqaralyq toby ataıdy. 

Koronavırýstardan paıda bolǵan basqa eki aýrýǵa buǵan deıin klınıkalyq kórinisterdi sıpattaıtyn ataýlar berilgen: "SARS" (aýyr jedel respıratorlyq sındrom) jáne "MERS" (Taıaý Shyǵys respıratorlyq sındromy).

Densaýlyq saqtaý uıymy aýrýlardyń resmı ataýyn jarıalaǵannan keıin kóp uzamaı halyqaralyq vırýstardyń taksonomıasy komıteti ony týdyrǵan vırýsty "SARS-CoV-2" dep ataýdy usyndy. Zertteý boıynsha bul termın 2003 jyly anyqtalǵan "SARS" vırýsymen jańa vırýstyń uqsastyǵyn bildiredi.