Túrkistan oblysy polısıa departamentiniń burynǵy qyzmetkeri, polısıa kapıtany Sáken Seıitjaparov "bala zorlady" dep aıyptalyp, 15 jylǵa sottaldy. Buǵan qosa, Seıtjaparov polısıa kapıtany sheninen aıyryldy. Mundaı úkimdi keshe, 19 aqpanda Túrkistan oblystyq qylmystyq ister jónindegi mamandandyrylǵan aýdanaralyq soty shyǵardy.

Oblystyq sottyń málimetinshe,  Seıtjaparov Qylmystyq kodekstiń "Nápsiqumarlyq sıpattaǵy kúsh qoldaný is-áreketteri" jáne "Qorqytý" baptary boıynsha kináli dep tanyldy.  Sot  úkimi kúshine engen joq, aıyptalýshynyń apelásıalyq shaǵym túsirýge quqyǵy bar.

Oblystyq sottyń baspasóz qyzmetiniń málimdeýinshe, sottalýshy 2013 jyly ishimdik iship, mas kúıinde kámelet jasqa tolmaǵan balanyń dármensiz kúıin paıdalanyp, seksýaldyq sıpattaǵy áreket jasap, bul áreketin beınetaspaǵa túsirgen.

"Sottalýshy beınetaspany ınternetke salatynyn aıtyp, kámeletke tolmaǵan balany bir jylda birneshe ret zorlaǵan, aqsha alǵan" dep habarlady sot.

Oqıǵa Túrkistan oblysy Saryaǵash aýdanynda bolǵan. İs birneshe jyl tergelip, 2019 jyldyń sońynda sotqa jetken. İs sotta jabyq qaraldy.