SHQO oblysyndaǵy Zaısan jáne Úrjar aýdanyna Qytaıdan qazaqstandyqtar kelgen. Bul týraly oblystyq densaýlyq saqtaý basqarmasynyń basshysy İlıas Muhamedjan habarlady. 

"QHR shekarasyna jaqyn jatqan Zaısan jáne Úrjar aýdandarynda QHR-dan kelgen Qazaqstan azamattaryn baqylaý úshin jalpy sany 295 tósektik jeke turǵan ǵımarattardaǵy karantındi stasıonarlar daıyndaldy. Bul kelgen barlyq adamdar, birinshiden bizdiń jerlesterimiz, ekinshiden, aýrý belgileri joq deni saý adamdar.
Shyǵys Qazaqstan aýmaǵyna QHR shekarasy arqyly kelgen árbir adamdy shekarada medısına qyzmetkerleri tekserip jatyr. Eger adamda shaǵym bolmasa, dene qyzýy qalypty jaǵdaıda, jótel men tumaý bolmasa, onda olar Qazaqstannyń bas sanıtarlyq dárigeriniń qaýlysyna sáıkes observasıalyq tósekke baqylaýǵa, emdelýsiz ornalastyrylady. Eger de kelgen azamattardy tekserý kezinde vırýsty ınfeksıa aýrýynyń belgileri anyqtalsa, olardy birden ınfeksıalyq aýrýhanaǵa jatqyzady. Sondaı-aq eger osy observasıalyq ǵımarattarda karantındegi adamdarda aýrý belgileri anyqtalsa, biz olardy oqshaýlap, keıinnen emdeý úshin juqpaly aýrýlar bólimshesi men bokstarǵa aýystyramyz", - deıdi oblystyq densaýlyq saqtaý basqarmasynyń basshysy. 

Semeı jáne Óskemen qalalarynda ftızıopýlmonologıalyq aýrýhanalarda 110 oryndyq tósek-oryn daıyndalǵan. Kerekti jaǵdaıda Shemonaıha aýdanyndaǵy Ýba sanatorııinde 250 oryn, Altaı aýdanyndaǵy Grehovo sanatorııinde 80 oryn jáne Tarbaǵataı aýdany, Aqjar aýylyndaǵy týberkýlezge qarsy dıspanserde 100 tósektik baqylaý aýrýhanalary ornalastyrylady.