Qazaqstan Respýblıkasy Parlamenti senatynyń tóraǵasy Darıǵa Nazarbaeva elektr energetıkasy salasynyń jumysy men halyqty elektrmen úzdiksiz qamtamasyz etý máseleleri boıynsha jumys kezdesý ótkizdi, dep habarlaıdy Parlament senatynyń resmı saıtyna silteme jasap.

Senat tóraǵasy kezdesýdiń mańyzyna toqtala kelip, ótken jyldyń qarasha aıynda Nur-Sultan qalasynda elektr energıasy birneshe márte óship qalǵanyn eske saldy.

«Qalanyń bir bóligi elektr jaryǵynsyz qaldy, onyń sebebin bilý ári túsiný úshin memlekettik ýákiletti organdardy tyńdaǵymyz keledi. Sol jaǵalaýdyń komýnıkasıalary men ınfraqurylymy jaqynda salynǵan, olardy kónerdi nemese apatty jaǵdaıda dep aıtýǵa bolmaıdy», - dedi ol.

«Astana AEK» Basqarma tóraǵasy Serik Balqyshev óz baıandamasynda tutynýshylardy elektrmen jabdyqtaýdaǵy uzaq úzilisterge dýshar etken aqaýlarǵa monıtorıń nátıjeleri ıesiz jeliler men qosalqy transformatorlyq stansıalar negizgi sebep ekenin aıtty. «Astana AEK» basshysynyń aqparaty boıynsha, qurylys kompanıalary kóp páterli turǵyn úı keshenderin paıdalanýǵa bergennen keıin úı ishindegi ınjenerlik komýnıkasıalardy qyzmet kórsetetin kompanıalarǵa tapsyrady.

«Syrtqy elektr jelileri ıesiz qalady, olarǵa tıisti qyzmet kórsetilmeıdi ári kúzetilmeıdi, sonyń nátıjesinde qosalqy stansıalardyń jabdyqtary buzylady ári isten shyǵady. Qazirgi ýaqytta syrtqy ınjenerlik jelilerdi mamandandyrylǵan qyzmet kórsetetin uıymdarǵa berý máselesi normatıvtik-quqyqtyq aktilermen rettelmeı keledi», - dedi ol.

Darıǵa Nazarbaeva talqylaý barysynda ıesiz jańa jelilerdiń paıda bolýynyń aldyn alý máselesine erekshe nazar aýdardy. Sondaı-aq, kásipkerlik kodeksti qaraýǵa asa muqıat oralý kerektigin eskertti.

«Qandaı máselelerdi qarastyrsaq ta, baqylaýdyń joqtyǵy problemasyna udaıy tap bolamyz, tıisinshe memleket sapaǵa jaýap bere almaı otyr», - dedi Nazarbaeva.

Nazarbaeva óz kezeginde elektr energetıkasy salasyn ákimshilendirýdegi sapanyń tómendigine nazar aýdardy. 

«Baqylaý joq, kásiporyn zań men normatıvtik-quqyqtyq aktilerdi adal oryndaýy úshin monıtorıń jasaý kerek. Retteý quramy da joq. Shyǵyndar bárimizdiń qaltamyzdan tólenedi, esep-shot kelgen kezde oılanbastan tóleı salamyz», - dep atap ótti Darıǵa Nazarbaeva.