Pavlodar oblysy ákiminiń orynbasary bolyp "Halyq banki" AQ-nyń tóraıymy Úmit Shaıahmetovanyń uly  Sáken Shaıahmetov taǵaıyndaldy. Bul týraly  oblys ákimdiginiń baspasóz qyzmeti habarlady.

29 jastaǵy Sáken Shaıahmetov 1990 jyly 2 mamyrda Almaty qalasynda dúnıege keldi. AQSH-ta Tehas ýnıversıtetin munaı-gaz isi jáne ekonomıka mamandyǵy boıynsha bitirgen. Sonymen qatar birneshe joǵary bilimi bar. 

Shaıahmetov eńbek jolyn 2011 jyly Atyraý oblysyndaǵy "Bolashaq" zaýytynda mehanık kómekshi bolyp bastaǵan. 2012-2014 jyly "Caspi Meruerty Operating" kompanıasynda ekonomıs bolyp jumys istedi. Keıinnen 2017 jylǵa deıin magıstratýrada bilim alady. 

Ákimdiktiń baspasóz qyzmeti habarlaǵandaı, Sáken Shaıahmetov Prezıdenttik jastar kadr rezerviniń quramyna engen. Ol ınvestısıalar, kásipkerlikti damytý jáne erkin ekonomıkalyq aımaqtar máselelerin qadaǵalaıtyn bolady.