Shyǵys Qazaqstan oblysynyń ákimi Danıal Ahmetov Zaısanda Saryterek aýylynyń turǵyndarymen kezdesip, túsindirý jumystaryn júrgizdi, dep habarlady oblys ákiminiń baspasóz hatshysy Aıgúl Bazarova. 

Saryterek aýylynyń turǵyndary keshe, 19 aqpanda saǵat 15:00-de aýyldyń ambýlatorıanyń aldyna narazylyqqa shyqqan. Jınalǵan halyq jergilikti bılikten koronavırýsqa tekseretin oryndy aýyldyń ambýlatorıasynda uıymdastyrmaý jáne oblysqa jumys isteýge kelgen Qytaı azamattaryn elden shyǵarý talaptaryn qoıǵan.

Baspasóz hatshysynyń aıtýynsha, búgin tańǵy ýaqytta Zaısanǵa jetken oblys ákimi narazylyqqa shyqqandarmen kúni boıy 3-4 ret kezdesken. Kezdesýlerdiń qorytyndysy boıynsha oblys ákimi málimdeme jasady.

– Aıtylǵan máseleni az ýaqyt ishinde qaraýymyz kerek. Mine, barlyq halyq taratyldy. Birde-bir másele joq. Biraq qıyn áńgime boldy. Kelisim aldyq. Osy jaǵdaı boıynsha qurylǵan komısıany ózim basqaramyn. Qurylǵan komısıanyń 15 múshesi bar. Qaı jaqta observasıa uıymdastyramyz, kelgen kisilerdi qaı aýrýhanalarǵa jatqyzamyz, sodan keıin qytaılyqtarmen qalaı jumys isteımiz – osynyń bárin komısıa qaraýy kerek. Halyqqa sol sheshimdi habarlaımyz, – dedi oblys ákimi Danıal Ahmetov.