22 aqpanda azamattardy "zańsyz mıtıńige" shyqpaýǵa shaqyryp, eskertý jasaǵan Qazaqstan bas prokýratýrasy juma kúni taǵy da málimdeme jasady. Onda vedomstvo shetelde turatyn opozısıalyq saıasatker Muhtar Áblázovti qaralap, ol shaqyrǵan mıtıńige qatyspaýǵa keńes bergen. Bul týraly Azattyq habarlady.  

Málimdemede bas prokýratýra Áblázovti "qoǵamǵa iritki salyp júrgen qylmysker", "eldegi iri oqıǵalardy jeke múddesine paıdalanǵysy keletin qylmystyq jaýapkershilikten qashyp júrgen" adam retinde sıpattaıdy. Vedomstvo adamdardy "arandatýǵa iligip ketpeı, zańsyz aksıalarǵa qatysýdan bas tartýǵa" shaqyrady.

Qazaqstan bıligin synaýshy, shetelde turatyn opozısıalyq saıasatker Muhtar Áblázov jaqtastaryn mıtıńige shaqyrǵan saıyn bas prokýratýra azamattarǵa eskertý jasap, "zańsyz mıtıńige qatysqandar" ákimshilik jazaǵa tartylady dep málimdeýmen keledi. Áblázov qurǵan "Qazaqstannyń demokratıalyq tańdaýy" qozǵalysy 2018 jyly elde "ekstremıstik uıym" dep tanylyp, qyzmetine tyıym salynǵan. Al Áblázov Qazaqstan sotynyń sheshimimen kelispeıdi. Eýroparlament 2019 jylǵy naýryzdaǵy rezolúsıasynda QDT-ny "beıbit opozısıalyq qozǵalys" dep ataǵan.

Keıbir quqyq qorǵaýshylardyń aıtýynsha, yqtımal mıtıń qarsańynda Qazaqstanda belsendilerdiń qamalyp, mıtıń bolady dep belgilengen oryndardyń qorshaýǵa alynatyny ádetke aınalǵan. Bul joly da Qazaqstannyń túrli aımaǵynda jıyrmadan astam belsendi (keıbir belsendiler budan da kóp bolýy múmkin deıdi) qamaldy. 

Muhtar Áblázovqa Qazaqstanda "aqsha jymqyrý", "qylmystyq top qurý", "adam óltirýdi uıymdastyrý" sıaqty birneshe aýyr baptar boıynsha aıyp taǵylyp, eki ret syrttaı sottaldy. Áblázov Qazaqstan bıligi taqqan aıyptyń bárin joqqa shyǵaryp, "bılikke opozısıa bolǵanym úshin ósh alǵysy keledi" dep sıpattaıdy.