Bilim berý salasynyń qyzmetkerlerimen kezdesken Jambyl oblysynyń ákimi Berdibek Saparbaev mektep dırektorlaryn synǵa aldy, dep habarlaıdy oblys ákiminiń baspasóz qyzmeti. 

– Oqý oryndarynyń keıbir basshylary "meniń mektebim", "meniń ustazdarym", "meniń shákirtterim" degen sıaqty tirkesterdi qoldanyp, ózderin uıymdastyrýshy emes, menshik ıesi sekildi sezinedi. Mektep – memlekettiki, al dırektor – aýysyp otyratyn basqarýshy bolýy tıis, – dedi Saparbaev.

Ákim bilim berý uıymdaryndaǵy jemqorlyq máselesine de toqtaldy.

– Dırektor jumysqa ornalastyrǵany úshin muǵalimnen aqsha alsa, odan sapaly jumysty qalaı talap etedi? Ol muǵalim keıin óz aqshasyn ata-analar arqyly qaıtara bastaıdy, sybaılas jemqorlyq tizbegi osylaı jalǵasa beredi, – dedi oblys ákimi.

Sondaı-aq ol mektepterde ata-analar komıtetiniń is júzinde jumys istemeıtinin aıtyp, pedagogtar ınertti ustanymǵa ıe dedi. Iaǵnı, bala tártip buzǵan jaǵdaıda ata-analarǵa shaǵymdana almaıtynyn atap ótti. Biraq oblystyq ata-analar komıtetiniń jetekshisi Elmıra Myrza-Ǵalı ártúrli reıdter boıynsha aýdandardy aralap shyqqandaryn jetkizýge tyrysqanymen, aımaq basshysy nátıjesiz jumystyń eshkimge kerek emestigin eskertti.