«Nur Otan» partıasy tóraǵasynyń birinshi orynbasary Baýyrjan Baıbek elimizdiń Ońtústik óńirlerine sapar shegip, aýyl turǵyndarymen kezdesý ótkizdi. Ol aldymen Shymkent qalasyna at basyn tirep, qaladaǵy birqatar problemalyq nysandardy aralady. Sondaı-aq búgin kezekten tys konferensıada qala ákimi Murat Áıtenov qalalyq fılıaldyń tóraǵasy bolyp saılandy. Bul týraly partıa tóraǵasynyń birinshi orynbasary feısbýk paraqshasynda habarlady. 

Ol jumys saparyn qala ákimimen birge Shymkenttiń Abaı aýdanyndaǵy M. Vodopánov kóshesiniń ótken jyly úıleri órtengen turǵyndarymen kezdesýden bastady. Bul problemalyq nysan partıa tóraǵasy birinshi orynbasarynyń aldyńǵy saparynyń qorytyndysy boıynsha qyrkúıekte partıalyq baqylaýǵa alynǵan bolatyn. Qazirgi ýaqytta «Otaý stroı» qurylys kompanıasy turǵyn úıdiń irgetasyn qalap, ekinshi qabatyna qurylys-montaj jumystaryn júrgizýde.

«Elbasy aıtqandaı, «Nur Otan» – naqty isterdiń partıasy. Sondyqtan osy máseleni baqylaýda ustap, arnaıy kelip, ózderińizben kezdesip otyrmyz. Ózderińiz kórip otyrsyzdar, kompanıa bar, qarajat bólingen, qurylys júrip jatyr. Bul másele partıanyń baqylaýyna alynǵan. Bizben birge qala ákiminiń ózi kelip otyr. «Jumyla kótergen júk jeńil» degen. Bári zań sheńberinde sheshiledi», – dedi Baýyrjan Baıbek.

Jergilikti bıliktiń málimetine qaraǵanda, 5 qabatty turǵyn úıdiń qurylysyna jýyrda búdjetti naqtylaý kezinde qajetti qarajat bólinedi. Turǵyn úı jyl sońyna qaraı paıdalanýǵa beriledi.

Sodan soń Baýyrjan Baıbek qalaǵa budan bes jyl buryn qalaǵa qosylǵan «Tasken» yqsham aýdanyna bardy. Munda 2 myńdaı úı men birqatar áleýmettik nysan elektr energıasynyń aýyq-aýyq úzilip qalýynan qıyndyq kórip otyr. 

«Osy shaǵyn aýdanda tıisinshe jumystar júrip jatyr. 2000 úı degen ol úlken sharýa. Gaz sheshilýde, sý sheshilip jatyr. Qalǵan máseleler de retimen sheshiledi. Qyrkúıek aıyna deıin jergilikti monopolıs «Ońtústik Jaryq Tranzıt» 270 mıllıon teńgege 39 km jańa jeli tartýdy jáne 9 transformator ornatýdy josparlap otyr. Tarıfterdiń ashyqtyǵy men komýnaldyq qyzmetterdiń sapasyn qamtamasyz etý maqsatynda «Nur Otan» bastamashylyq etken «Aıqyn tarıf» jobasynyń aıasynda biz bul máseleni partıalyq jáne qoǵamdyq baqylaýda ustaımyz, - dedi Baýyrjan Baıbek. 

Kezdesý kezinde turǵyndar basqa da túıitkelderdi, sonyń ishinde shaǵyn aýdandaǵy joldardyń sapasyna qatysty máselelerdi ortaǵa saldy. Jergilikti bıliktiń aıtýynsha, kóktemde osyndaǵy birneshe kósheni jóndeý jumystary bastalady.

Sonymen qatar «Nur Otan» partıasy tóraǵasynyń Birinshi orynbasary jumys sapary barysynda Shymkent qalasynyń belsendi turǵyndarymen, zıaly qaýymmen, jastarmen jáne úkimettik emes uıym ókilderimen birneshe kezdesý uıymdastyryp, qalanyń ózekti máselelerin birlese talqylady. Olardyń qatarynda qalanyń damýy, ınjenerlik jáne jol ınfraqurylymy, densaýlyq saqtaý, mádenı-áleýmettik jaǵdaıy, ıdeologıa salasy, rýhanıat jaıy bar. Baýyrjan Baıbek jurtshylyq kóterip otyrǵan máselelerdiń barlyǵy ázirlenip jatqan qalany damytýdyń 5 jyldyq baǵdarlamasyna enetinin atap ótti.