Jambyl oblysynyń Qordaı aýdanyndaǵy jappaı tártipsizdikter boıynsha 120-dan astam qylmystyq is tergelip jatyr. Bul týraly úkimettegi brıfıńte ishki ister mınıstrliginiń tergeý departamentiniń basshysy Sanjar Ádilov málimdedi.

– Qazirgi ýaqytta adam ólimi boıynsha qylmystyq kodekstiń 99-babyna sáıkes 11 qylmystyq is tergelip jatyr. Tergeý júrgizip jatqan vedomstvoaralyq tergeý-jedel tobyn Bas prokýratýra basqarady. Ókinishke qaraı, qylmystyq-prosestik kodekstiń 201-babyna sáıkes tergeýdiń aldyn ala qorytyndysyn, sondaı-aq qylmystyq jaýapqa tartylǵan, qamaýǵa alynǵan adamdardyń sanyn aıta almaımyn, – dedi Ádilov.

Buǵan deıin 90 qylmystyq is qozǵalǵany habarlanǵan edi.

Departament basshysy qazirgi tańda qamaýda otyrǵandardyń jáne kúdikke ilingenderdiń bar ekenin rastady. Ázirgi tergeý jumystary júrgizilýde.