Bul týraly Qazaq kúresi federasıasynyń birinshi vıse-prezıdenti Arman Shoraev Ortalyq komýnıkasıalar qyzmetindegi baspasóz máslıhatynda aıtty, dep habarlaıdy Qamshy.kz aqparat agenttigi. 

«Byltyr qyrkúıek aıynda Abylaı han babamyzǵa arnalǵan elimizde úlken monýment boı kóterse degen ıdeıamen bólisken edim. Áleýmettik jelilerde bul taqyryp boıynsha qyzý talqylaý bolyp, sol jerde azamattardyń 95 paıyzy qoldaý bildirdi dep aıtsam ótirik emes. Sonymen qatar, memleket basshylyǵy tarapynan qoldaýǵa ıe boldyq. Búgin usynylyp otyrǵany bastapqy keskin dep aıtýǵa bolady», - dedi Arman Shoraev.

"Bastapqy keskin" demekshi, Abylaıhan monýmentiniń eskızdik jobasy da daıyn bolǵan. Ony sáýletshi  —  Aıdar Jamhan jasaǵan. Al jobaǵa ketetin qomaqty qarajatty halyqtan jınaý jaǵy da qarastyrylǵan.

«Búkil halyq bolyp osy monýmentti qoıýdy jón kórdik. Al jobaǵa  $5-7 mıllıon qajet jáne ol qarajatty asarlatyp, halyq bolyp, kásipker jigitter bolyp jınaımyz», - dedi qoǵam qaıratkeri.

Abylaıhan beınesindegi ǵımarattyń salynatyn oryny da kóp talqyǵa túsken, aqyrynda joba avtorlary aqyldasa kelip ony Abylaıhannyń ózi orda tikken Býrabaı men Kókshetaýdyń arasyndaǵy Kenesary degen aýyldyń janynan salýdy uıǵarǵan.

«Bireýler babamyzdyń beınesindegi ǵımaratty Ulytaýda, endi bireýler Almaty men Semeıde qoıýdy usyndy. Oılana kele, biz Abylaıhan óz ordasyn tikken Býrabaı men Kókshetaýdyń arasyndaǵy Kenesary degen aýyldyń janynan salamyz dep sheshtik. Eskertkishtiń irgetasy retinde paıdalanylatyn ǵımaratta murajaı ekspozısıasy, konferens-zal, kórme zaly jáne taǵy basqalary ornatylady. Kókshetaý Abylaıhannyń esimi ǵana emes. Onda Birjan sal, Aqan seri, Shoqan babamyz bar. Mundaı jobalar respýblıkanyń barlyq jerinde bolýy tıis, osy arqyly ishki týrızmdi damyta alamyz», - dedi ol.

Shara sońynda ádettegideı suraqtar qoıyldy. Sonyń ishinde jýrnalıserdiń «bul bastama Mońǵolıada  Shyńǵys hanǵa arnalǵan eskertkishtiń kóshirmesi emes pe?» degen saýalyna Qazaq kúresi federasıasynyń birinshi vıse-prezıdenti bul jobany prezıdenttiń ózi qoldap otyrǵanyn jetkizdi.

«Siz aıtyp otyrǵan, Shyńǵys hannyń monýmentine $5 mln jumsaldy. Halyq shamasy jetkenshe berse, qalǵanyn qazaqtyń elim, jerim degen ultshyl azamattary kóterip alady. Men muny buǵan deıin qazaq  barysyndaǵy tájirbıemnen bilemin. Al memleket bizge tek jer men ınfraqurylym jaǵynan qoldaý kórsetse boldy. Bul jobany prezıdentimiz Q.J.Toqaevtyń ózi qoldap otyr. Aldaǵy úsh jylda babamyzdyń beınesindegi ǵımarat salynyp bitedi», - dedi A. Shoraev.

Aıta keteıik, Abylaıhan beınesindegi ǵımaratty turǵyzatyn mamandy halyqaralyq konkýrs arqyly tańdamaq. Ol úshin komısıa músheleriniń qataryna M.Áshimbaev, M.Áýezov, T.Jurtbaı, Q.Myńbaı, D.Joljaqsynov, B.Ýálıev, T.Qajybaev, M.Mansurov pen Z.Kabýldınov kirgizilip otyr.