Kezdesý barysynda Indýstrıa jáne ınfraqurylymdyq damý vıse-mınıstri A.Erjanov pen İshki ister mınıstriniń birinshi orynbasary M.Qojaev Armenıa Respýblıkasynan ákelingen kólikterdiń Qazaqstan aýmaǵynda erkin júrýi úshin saqtalýy tıis ulttyq jáne eýrazıalyq zańnama normalaryn bastamashyl top ókilderine jan-jaqty túsindirip berdi.

Indýstrıa jáne ınfraqurylymdyq damý vıse-mınıstriniń túsindirýinshe, Armenıaǵa jeńildetilgen baj salyǵymen ákelingen kólikter sol eldiń aýmaǵynda ǵana júrýi tıis. Bul Armenıanyń Eýrazıalyq odaqqa kirýi barysyndaǵy negizgi sharttardyń biri bolǵan. Sondaı-aq ol Qazaqstan azamattarynyń armán bıliginiń salǵyrttyǵy saldarynan avtomobılderdi Armenıada turatyn azamat retinde tirkegendikterin atap ótti. Bul EAEO zańnamasyn buzý bolyp sanalady.

Al bastamashyl top ókilderi ózderi alyp kelgen kólikterdi tehnıkalyq reglamentke sáıkestigine qaramastan Qazaqstanda tirkeý úshin qajetti tólemderden bosatý arqyly zańdastyrýdy usyndy. Sonymen qatar olar 2020 jyldyń 1 naýryzynan bastap, Armenıadan jeke tulǵalardyń avtomobıl ákelýine tyıym salýdy nemese mundaı kólik quraldaryna keminde 3 mln teńge saqtandyrý engizýdi usynyp otyr. Óz kezeginde ókiletti organdardyń ókilderi qoldanystaǵy zańnamaǵa sáıkes avtomobılderdi tirkeýge keńes berdi.

Kezdesý sońynda bul máseleni Indýstrıa jáne ınfraqurylymdyq damý mınıstrligi alańynda talqylaýdy jalǵastyrý usynyldy. Sonymen qatar avtomobıl ıelerine zańsyz sherý ótkizý arqyly Qazaqstan zańnamasyn buzbaýǵa keńes berildi.