Saıasattanýshy, Ulttyq senim keńesiniń múshesi Erlan Saırov beıbit jınalystar týraly zań jobasyn talqylaý - azamattar men bıliktiń qarym-qatynasynyń jańa modelin jasaıdy, dep habarlaıdy QazAqparat.

Erlan Saırov «Qazaqstan Respýblıkasyndaǵy beıbit jınalystar, mıtıńter, sherýler, pıketter men demonstrasıalar uıymdastyrý jáne ótkizý tártibi týraly» zań jobasyna qatysty synǵa toqtalyp ótti.

«Syn elimizdiń qoǵamdyq ómiriniń bir bóligine aınalýy kerek ekenin túsinýimiz kerek. Biz oǵan úırenip, ony qabyldaýymyz qajet. Syn buryn da bolǵan, qazir de bar jáne bola da beredi. Meniń oıymsha, búgingi tańda zań jobasyn talqylaýdyń ózi azamattar men bıliktiń qarym-qatynasynyń jańa modelin jasaıdy», - dedi Erlan Saırov elordada zań jobasyn talqylaý barysynda.

Ol Memleket basshysy Twitter paraqshasynda zań jobasy boıynsha óz pikirin bildirgeni týraly aıtty.

«Memleket basshysy keshe ǵana Twitter paraqshasynda zań jobasy boıynsha óz pikirin bildirdi. Bul óte mańyzdy. Zań jobasyn azamattar ǵana emes, Memleket basshysy da talqylaıtynyn kórip otyrmyz. Buz zań bizdiń kóz aldymyzda ózgerip, jańa sıpatqa ıe bolyp jatyr dep sanaımyn. Meniń oıymsha, bizde habarlandyrý júıesiniń prınsıpin tolyq qamtamasyz etetin zań bolady», - deıdi Erlan Saırov.

Sondaı-aq, ol beıbit sherýge qatysýshylar sanyna toqtaldy.

«Talqylaýǵa qatysatyndarǵa «Mıtıńke 251 adam kelse ne bolady?« degen suraq qoıamyn. Mundaı suraqtarǵa belgili bir jaýaptarymyz bolýy kerek. Zań boıynsha qatysýshylar sany artyp ketse, mıtıń toqtatylýy kerek. Bul máseleni jan-jaqty jetildirip, qatysýshylar sanyna qatysty oılanýymyz kerek», - degen pikir bildirdi.