10 jyldan astam túrmede otyrǵan "Qazatomónerkásip" kompanıasynyń burynǵy jetekshisi Muhtar Jákishev shartty jazamen bostandyqqa shyǵatyn boldy. Búgin, 3 naýryzda Semeı qalalyq №2 soty shyǵarǵan sheshimge sáıkes, Jákishev "probasıalyq baqylaýǵa alynady, jaza merzimi tolyq aıaqtalmaıynsha Qazaqstan aýmaǵynan shyǵarylmaıdy". 

56 jastaǵy Muhtar Jákishev 2009 jyly mamyrda ustalyp, "Venada (Avstrıa) "Qazatomónerkásip" kompanıasynyń zańsyz ókildigin ashý arqyly paıda tapty, astyrtyn kasa ustady, kúzetshisine qosymsha eńbekaqy tólep kelgen" degen aıyppen 14 jylǵa sottalǵan. Túrmede otyrǵan kezde úshinshi top múgedektigin alǵan Jákishev ózine taǵylǵan aıyptarmen kelispeıdi.

Qazaqstandyq quqyq qorǵaýshylar Jákishevti "saıası tutqyndar" tizimine qosqan. Quqyq qorǵaýshylar "Jákishev elden qashqan Muhtar Áblázovpen (burynǵy bankır, Qazaqstan bıligin synaýshy) aralasqany úshin qysymǵa ushyrady" dep sanaıdy. Al Qazaqstan bıligi elde "saıası tutqyndar joq" dep esepteıdi.

Buǵan deıin onyń merziminen erte bosatý týraly ótinishteri qanaǵattandyrylmaǵan. Ótken jyldyń ózinde Jákishev isi boıynsha úsh ret apelasıalyq sot ótip, onyń jazasy ózgerissiz qalǵan edi. Sot "Jákishev memleketke keltirgen 99,6 mıllıard teńge kóleminde shyǵyndy ótemedi" degen bolatyn. 

Qazaqstanda sońǵy jyldary Muhtar Jákishevti bostandyqqa shyǵarýdy talap etken aksıalar jıiledi. Oǵan qatysqandar Jákishevtiń "saıası tutqyn" ekenin aıtyp, bılik ony zańsyz ustap otyr dep esepteıdi.