Qazaqstan Syrtqy ister mınıstrliginiń resmı ókili Aıbek Smadıarov "Ońtústik Koreıadaǵy Qazaqstan azamatynan koronavırýs anyqtaldy" degen aqparattyń jalǵan bolyp shyqqanyn aıtty. 

Onyń sózinshe, Ońtústik Koreıanyń áleýmettik jelilerinde taraǵan ol aqparatty Koreıadaǵy Qazaqstan elshiligi tekserip, joqqa shyǵarǵan. 

"2020 jyldyń 3 naýryzynda Ońtústik Koreıanyń áleýmettik jelileriniń orys tildi toptarynda "Ońtústik Koreıada zańsyz júrgen Qazaqstan azamatynyń koronavırýske shaldyqqany rastaldy" degen aqparat tarady. Atalǵan áleýmettik jelilerdiń habarlaýynsha, Qazaqstan azamaty klınıkadan qashyp ketip, ony qazirgi ýaqytta polısıa izdestirýde. Mundaı aqparat "Habar 24" telearnasynda da habarlanǵan. Qazaqstannyń Ońtústik Koreıadaǵy Elshiligi tıisti sharalar júrgizip, onyń nátıjesinde bul aqparat rastalmady. Jergilikti polısıamen jáne bizdiń azamatpen baılanys ornatylǵan. Ol buǵan deıin klınıkaǵa barmaǵynyn jáne koronavırýs bar-joǵyn anyqtaıtyn qandaıda bir saraptama tapsyrmaǵanyn jetkizdi" dedi vedomstvo ókili.

Onyń aıtýynsha, koreı polısıasynyń aqparatyna sáıkes, osydan birneshe kún buryn qazaqstandyq azamat koronavırýske shaldyqqan adam barǵan qoǵamdyq tamaqtaný ornynda bolǵan.

"Osyǵan baılanysty belgilengen tártipke sáıkes, oǵan jáne sol ýaqytta atalǵan orynda bolǵan barlyq adamdarǵa eger aýrýdyń syrtqy belgileri baıqalǵan jaǵdaıda vırýstyń bar-joǵyn anyqtaý testin tapsyrý qajet. Otandasymyz barlyq qajetti medısınalyq prosedýralardan ótýge jáne jergilikti bılikpen yntymaqtasýǵa daıyn. Bizdiń Elshilik koronavırýs Ońtústik Koreıa aýmaǵynda anyqtalǵan alǵashqy kúnnen bastap jergilikti İshki ister mınıstrligimen jáne Aýrýlardy baqylaý, aldyn alý jónindegi koreı ortalyǵymen tyǵyz jumys istep keledi. Atalǵan ortalyqtyń usynysy boıynsha bizdiń otandasymyz telefon arqyly kúndelikti densaýlyǵyna baqylaý júrgizip, úı karantıninde bolýy qajet. Bul usynys aýrýdyń syrtqy belgileri joqtyǵyna negizdelgen jáne ony emdeýge jatqyzýdan jáne koronavırýstyń bolýyn testileýden bas tartyldy" dedi Smadıarov.

Resmı ókildiń sózinshe, Qazaqstannyń Ońtústik Koreıadaǵy Elshiligi bul máseleni turaqty baqylaýǵa alǵan.

"Joǵaryda baıandalǵanǵa baılanysty QR Syrtqy ister mınıstrligi BAQ ókilderine tekserilmegen aqparatty jarıalap, dúrliktirmeýdi jáne úreı týdyrmaýdy suraıdy. Syrtqy saıası vedomstvonyń resmı túsiniktemesin kútý qajet. Sonymen qatar Qazaqstan azamattaryndaǵy koronavırýske qatysty aqparattar alý úshin QR Densaýlyq saqtaý mınıstrligine habarlasýdy suraımyz. Al Syrtqy ister mınıstrligi shet elderdegi bizdiń otandastarymyzǵa qatysty aqparatty tekserip, naqty málimet berýge tyrysady" dedi ol.

Keshe keshke qaraı Qazaqstandaǵy memlekettik telearnalardyń biri – "Habar 24" Ońtústik Koreıada Qazaqstan azamatynan koronavırýs belgileri anyqtalǵanyn habarlaǵan.

Kóp uzamaı bul aqparat arnanyń saıtynan óshirildi. 

Ońtústik Koreıa koronavırýs juqtyrǵandar sany kóbeıip bara jatqan Iran, Italıa sıaqty memleketter qatarynda. Sońǵy aqparatqa sáıkes, Ońtústik Koreıa – koronavırýs juqtyrǵandar sany boıynsha Qytaıdan keıingi ekinshi el. 

Syrtqy ister mınıstrliginiń dereginshe, Ońtústik Koreıada 35 myń Qazaqstan azamaty bar. Olardyń 12 myńy zańsyz júrgender. Buǵan deıin vedomstvo Qazaqstan qajet bolǵan jaǵdaıda ǵana Koreıadan óz azamattaryn evakýasıalaıtynyn málimdegen.