Jambyl oblysy Qordaı aýdanynda qazaqtar men dúngender arasynda bolǵan etnıkalyq janjaldan keıin Masanchı aýylyndaǵy ǵımarattyń úıindisi astynan tabylǵan máıit Murat Masanovtyń múrdesi bolyp shyqty. Bul týraly Jambyl oblysy polısıa departamenti habarlady. 

Organnyń habarlamasyna qarǵanda, úıindi astynan tabylǵan máıitti anyqtaý úshin Qordaıda janjal bolǵany kúni joǵalyp ketken Murat Masanovtyń týysqandarynan qan alynyp, genetıkalyq saraptama jasalǵan. Saraptama qorytyndysy máıttiń Murat Masanov ekenin kórsetken. Polısıanyń málimetinshe, Murat Masanov 20 jasta bolǵan.

Buǵan deıin birqatar BAQ Murat Masanovtyń janjal bolǵan kúni keshke Masanchıdiń janyndaǵy Qarasaı aýylyndaǵy týystaryna baram dep úıden shyǵyp ketip, qaıtyp oralmaǵanyn jazǵan bolatyn. Keıin onyń órtengen kóligi 8 aqpanda Masanchı aýylynyń mańynan tabylǵany belgili boldy. 

Aqpannyń jetisinen segizine qarǵan túni Jambyl oblysy Qordaı aýdanyndaǵy birneshe aýylda etnıkalyq qazaqtar men dúngender arasynda janjal bolyp, resmı derek boıynsha, 10 adam qaza taýyp, 180-nen asa adam zardap shekken. Osy oqıǵadan keıin eki-úsh kúnnen soń janjal bolǵan Masanchı aýylynda qıraǵan ǵımarattan taǵy bir adamnyń múrdesi tabylǵan edi.