Qazaqstannyń Tuńǵysh Prezıdentiniń tóraǵalyǵymen «Nur Otan» partıasy Saıası keńesi Búrosynyń otyrysy ótti. Kezdesý barysynda 18 naýryzda ótetin partıanyń Saıası keńesi otyrysynyń kún tártibi talqylandy.

Búro otyrysyn ashqan Elbasy partıa jumysyn jandandyrý baǵdarlamasy men «Baqytty otbasy», «Ardagerlerdi ardaqtaıyq», «Kedergisiz keleshek» atty áleýmettik jobalardyń júzege asyrylýyna oń baǵa berdi.

Sonymen birge, Nursultan Nazarbaev partıanyń óńirlerdegi jumysyna nazar aýdardy.

– Partıa basshylyǵy, Májilis pen máslıhat depýtattary jergilikti jerlerdi aralaýǵa tıis, sonyń ishinde, shalǵaı aýdandarǵa barýy kerek. Adamdarmen kezdesip, problemalardy jan-jaqty zerdeleý, olardy sheshý mańyzdy. Bul máselelerdiń barlyǵy óńirlik partıa baǵdarlamalarynda kórinis tabýy qajet, – dedi partıa Tóraǵasy.

Sonymen qatar, Búro otyrysynda osy jyldyń 30 naýryzy men 16 mamyry aralyǵynda eldiń barlyq óńirlerinde jańa formatta partıanyń ishki irikteýin – praımerız ótkizý týraly sheshim qabyldandy.

– Bul partıa atynan máselelerdi sheshetin eń belsendi jáne senimdi múshelerdi anyqtaýǵa múmkindik beretin durys sheshim dep sanaımyn, – dedi Elbasy.

Otyrystyń qorytyndysy boıynsha Búronyń qaýlysy qabyldandy. Oǵan sáıkes irikteýdi júrgizý erejesiniń jobasy aldyn-ala maquldandy. Ol 18 naýryzda Saıası keńestiń otyrysynda bekitiledi.

Praımerız nátıjesinde «Nur Otan» partıasynan Májilistiń jáne barlyq deńgeıdegi máslıhattardyń saılaýaldy partıalyq tizimderine kandıdattar anyqtalady dep josparlanyp otyr.

Sondaı-aq, partıanyń 2025 jylǵa deıingi sybaılas jemqorlyqqa qarsy isqımyl baǵdarlamasyn júzege asyrýdyń Jol kartasy bekitildi.