– Biz kezikken eń alǵashqy qıyndyq –  áýe reısterdiń toqtatylýy. Qytaımen baılanys jabylǵan. 1 naýryzdan bastap Ońtústik Koreıa jáne Iranmen áýe qatynasy qysqardy. Iranǵa qazaqstandyqtar kóp barmaıtyndyqtan, ol jaqtyń jabylýy biz úshin qıyndyq týdyrmaıdy. Biraq osy ýaqytta otandastarymyz Ońtústik Koreıaǵa medısınalyq jáne em-saýyqtyrý maqsatymen jıi baratyn. Sondyqtan bul elge reısterdiń azaıtylýynyń áseri sezilýde. Sondaı-aq azamattar toptasyp baratyn jerdiń biri – Haınan edi. Munda da kedergilerge tap boldyq. Vırýs epıdemıasy Taıland pen Egıpet sıaqty ózge de maýsymdyq baǵyttarǵa áser etýde. Bir jaǵynan, bizge Qytaıda vırýsqa shaldyǵýshylar sany kemigeni jóninde aqparat túsýde. Biraq barýǵa shekteý qoıylǵan oryndarǵa jańa elder qosylyp jatyr. Bul syrtqa shyǵýshylarǵa áser etpeı qoımaıdy, – deıdi ol.

Rashıd Shaıkenovtyń sózinshe jaǵdaı ishki týrızmge de áser etken.

– Merekelik demalystarda qazaqstandyqtar ádette el ishinde saparǵa shyǵatyn. Bıyl qalaı bolatyny belgisiz. Jaǵdaıdy baǵamdaý qıyn bolyp tur. Bıliktegilerdiń "Qazaqstanda koronavırýs joq" degenine qaramastan, azamattar densaýlyǵyna alańdaýly, adam kóp baratyn sharalarǵa qatysýdy sıretken, – dedi qaýymdastyq dırektory.

Koronavırýs qaýpiniń kesirinen sheteldik týrıser Qazaqstanǵa josparlanǵan týrlarynan kóptep bas tartyp jatqanǵa uqsaıdy.

Sarapshy sanıtarlyq qaýipsizdikke jaýapty memlekettik organdardyń saıasaty túsiniksiz ekenin aıtty. "Anda barýǵa bolmaıdy, mynda barýǵa bolmaıdy" degendeı aqparattar jıi shyǵady. Sondaı aqparattardyń qatarynda "Sharynǵa barýǵa bolmaıdy" degen derek kezdesken. Biraq artynan bul jalǵan ekeni anyqtaldy.

"Osyndaı faktorlar kesheni týrızmge teris áser etip jatyr" deıdi maman.