Álemde munaı baǵasy tómendep, dollar baǵasynyń ósýine baılanysty  Qazaqstan prezıdenti Qasym-Jomart Toqaev úkimet músheleri jáne ulttyq bank tóraǵasymen keńes ótkizdi.  Aqordanyń habarlaýynsha, jıynda álemdegi ekonomıkalyq jaǵdaı jáne onyń Qazaqstan ekonomıkasyna áserin talqylandy.

Úkimet pen Ulttyq bankke tapsyrma bergen Toqaevtyń premer-mınıstr Asqar Mamınniń basshylyǵymen shuǵyl áreket etý shtaby qurdy. Aqordanyń jazýynsha, daǵdarysqa qarsy is-qımyldar jospary ázirlenip, iri kásiporyndarda halyqty jumyspen qamtýǵa qoldaý kórsetý jóninde arnaıy jospar daıyndalmaq. 

"Úkimet 2020-2022 jyldarǵa arnalǵan respýblıkalyq búdjetti naqtylaý jóninde usynys engizedi. Memleket basshysy búdjet shyǵyndaryn qysqartý, óńirlerde halyqty jumyspen qamtamasyz etý, elimizdiń qarjy-valútalyq naryǵyn turaqtandyrý, respýblıkalyq jáne jergilikti   búdjetterdi ońtaılandyrý boıynsha sharalar qabyldaý qajettigin aıtty" delingen Aqorda habarlamasynda. 

Ótken aptanyń sońynda Venada OPEK, Saýd Arabıasy jáne Reseı munaı baǵasyn ustap turý úshin óndiristi azaıtýǵa kelissóz júrgizgen. Biraq Venadaǵy jıynda taraptar kelise almaı, Reseı OPEK usynysyn qoldamady. Osydan soń Saýd Arabıasy "baǵa soǵysyn" bastap, Azıa úshin munaı baǵasyn barreline úsh-tórt dollarǵa, AQSH úshin jeti dollarǵa deıin túsirip jiberdi. Al búgin, 9 naýryzda Brent markaly munaı barreline 36 dollardan satylyp, dollar baǵasy kúrt ósti. Búgin tańerteń Qazaqstandaǵy aqsha aıyrbastaý pýnkterinde dollar 397 teńgeden satyla bastaǵan.  Keıin tús aýa Nur-Sultan men Almatydaǵy keıbir aqsha aıyrbastaý oryndary dollar satýdy toqtatty.