Búgin palata spıkeri Nurlan Nyǵmatýlınniń tóraǵalyǵymen ótken májilistiń jalpy otyrysynda Ákimshilik rásimdik-prosestik kodeks jobasy jáne oǵan ilespe zań jobasy birinshi oqylymda maquldandy.

Jalpy otyrysta Májilis depýtaty Narıne Mıkaelán Sıfrlyq damý, ınovasıalar jáne aeroǵarysh ónerkásibi vıse-mınıstri Asqat Orazbekke sıfrlandyrýdy belsendi jyljytý jaǵdaıynda ákimshilik ádiletti engizýge qatysty memlekettik tilde birqatar suraq qoıdy. Alaıda vıse-mınıstr suraqtarǵa orys tilinde jaýap berdi.

Jaýapty tyńdap bolǵan soń májilis tóraǵasy memlekettik tilde qoıylǵan suraqqa qazaq tilinde jaýap bermegen Asqat Orazbekti synǵa aldy.

– Árıne, bizde aýdarma bar. Osy zalda otyrǵan árbir azamatqa qaı tilde sóıleımin dese de jaǵdaı jasalǵan. Biraq basqa ulttyń azamattary qazaq tilinde saırap turǵanda, Sizdiń memlekettik tilde jaýap bermegenińiz durys emes, – dedi Nurlan Nyǵmatýlın.

Maquldanǵan kodeks jobasynyń negizgi maqsaty – azamattarǵa basqarýshylyq sheshimderdi qabyldaý prosesine naqty qatysýǵa múmkindik beretin kepildikterdi bekitý jáne bılik organdarymen birge joǵary turǵan organ men sotta daýlardy qaraý kezinde azamattardyń quqyqtaryn qorǵaýdyń tıimdi tetikterin belgileý.