11 naýryzda Batys Qazaqstan oblysy Terekti aýdany Aqjaıyq aýylynyń turǵyndary jergilikti aýrýhanadaǵy korpýstardyń birin koronavırýsqa baılanysty karantındik blok retinde paıdalaný týraly sheshimge qarsy shyqty. Bılik ókilderi men turǵyndardyń kezdesýi kezinde shamamen 30 adam aýrýhananyń naýqastardy qabyldaýǵa shamasy kelmeıtinin aıtyp, karantınge adam ákelmeýdi talap etti7 Bul týray Azattyq habarlady. 

- Vırýs tabylǵan oryndardan adamdardy osynda ákeletinin keshe ǵana bildik. Vırýs oshaǵynda bolǵan adamdar bizdiń aýrýhanaǵa jatqyzylady. Men ózim úshin, balalarym úshin, aýylym úshin qorqamyn, - dedi Aqjaıyq turǵyndarynyń biri Baqytgúl Ájmaǵanbetova.

Onyń aıtýynsha, turǵyndarǵa karantındik korpýstyń nelikten Aqjaıyq aýylynda ornalasýy qajet ekenin eshkim túsindirmegen.

- Bizdiń aýylda juqpaly aýrýlar aýrýhanasy bar, sol úshin osynda bolady dep jatyr. Biraq aýrýhana naýqastardy qabyldaýǵa daıyn ba, joq pa, bilmeımiz. Bizdiń aýrýhanada eshqashan juqpaly aýrýmen aýyrǵandar jatpaǵan. Meniń oıymsha, dárigerler mundaı naýqastardy qabyldaýǵa daıyn emes, - deıdi Ájmaǵanbetova.

Bıliktiń aıtýynsha, aımaqta eshkimnen koronavırýs tabylmaǵan, sondyqtan bul jerge saý adamdar keledi.

- Munda karantındik stasıonar bolmaq, sondyqtan munda tek saý adamdar ǵana bolady. Barlyq eldi mekenderde, tipti Oralda da osyndaı karantındik bloktar bar. Eger úı jaǵdaıynda karantınde otyra almasa, olar karantındik stasıonarǵa jiberilmek. Vırýs jyldam tarap jatqandaı bolsa dep bes myń adamǵa shaqtap, oryn daıyndap otyrmyz, - dedi Batys Qazaqstan oblysynyń sapany baqylaý men taýarlar qaýipsizdigi departamentiniń basshysy Muhamǵalı Arysbaev.

Arysbaevtyń aıtýynsha, oblystaǵy eldi mekender aýrýdyń taralýyna daıyn bolýy kerek. Onyń aıtýynsha, Aqjaıyqtaǵy aýrýhana "tótenshe jaǵdaıǵa" daıyn.

- Jergilikti juqpaly aýrý aýrýhanasynyń ǵımaratynda barlyq jaǵdaı jasalǵan... Korpýs bokstarǵa bólingen, árbir boksqa jedel járdem kóligi kire alady. Árbir bokstyń palatalary men jeke sanıtarlyq toraby bar, kóshege shyǵatyn joly bar, olar bir-birinen alshaq ornalasqan, - dedi Terekti aýrýhanasynyń bas dárigeri Bekzat Qubaev.

Kezdesý shamamen eki saǵatqa sozyldy. Keıbir aýyl turǵyndary kezdesýde pikirleri eskerilmegenin aıtty.

- Eger bılik bizdi estimese, bizdiń pikirlerimizben sanasqysy kelmese, ne isteý kerektigin bilmeımiz. Koronavırýs juqtyrǵan adamdardy munda ákelýge túbegeıli qarsymyz, - dedi turǵyndardyń biri Darzan Qaıyrǵazıev.

Aqpan aıynyń sońynda Shyǵys Qazaqstan oblysynda Qytaımen shekaralas birqatar eldi meken turǵyndary aımaqta karantındik bloktardyń ashylýyna qarsylyq bildirgen edi.

Qazaqstan bıligi elde koronavırýs tabylmaǵanyn aıtady. Eldiń bas sanıtarlyq dárigeri Jandarbek Bekshın apta basynda jaqyn arada koronavırýs tabylýy múmkin ekenin eskertken.

Dúnıejúzilik densaýlyq saqtaý uıymy 11 naýryzda jańa koronavırýsty "pandemıa" dep atady. Álemde vırýsty juqtyrǵandar sany 122 myńnan asqan. 4,3 myń adam kóz jumǵan.