Premer-mınıstrdiń orynbasary Eraly Toǵjanov Qazaqstanda naýryz meıramyna oraı ótkiziletin is-sharalardyń tyıym salynýyna qatysty túsinikteme berdi. 

– Naýryz – bizdiń eń úlken meıramymyz. Sondyqtan azamattardyń barlyǵyna bas qospańdar dep aıtý qıyn. Sebebi qazaq burynnan beri bir-birine baryp, amandasyp, qal-jaǵdaıdy surastyrǵan ǵoı. Biraq ómirdiń qaýipsizdigi – basty másele. Koronavırýs qaýpine baılanysty Naýryz merekesi qarsańyndaǵy úlken toılarǵa, adamdar kóp jınalatyn jerlerge barýǵa tyıym salynyp otyr. Dese de adamdardyń bir-birine baryp, kórisýine, bir-birin quttyqtaýyna eshqandaı shekteý qoıylmaıdy, – dedi Toǵjanov arnaıy baspasóz máslıhatynda. 

Onyń sózinshe, adamdardyń bir-birine barýyna tyıym salý qıyn. Ony eshkim qadaǵalamaıdy.

– Árıne, árbir adam ózin ǵana oılamaýy kerek. Árbir azamat óz januıasyn oılaýy kerek, aınalasyndaǵy aǵaıyndaryn oılaýy kerek. Sondyqtan aǵaıyndar bir-birine baryp, quttyqtap jatsa, onda turǵan eshteńe joq dep oılaımyz. Al burynǵydaı myń adam jınalatyn úlken sharalarǵa tyıym salynady, – dep atap kórsetti Toǵjanov.