Bul týraly QR Qorǵanys mınıstrligi bergen túsiniktemede aıtyldy, dep habarlaıdy Qamshy.kz aqparat agenttigi.
Osyǵan deıin jazǵanymyzdaı qaıǵyly oqıǵa Qapshaǵaı qalasynda ornalasqan metal qabyldaý oryndarynyń birinde 14 naýryz kúni bolǵan.
Áleýmettik jeli arqyly tez taraǵan vıdeoǵa baılanysty jeli qoldanýshylar túrli pikir qaldyrǵan. Sonyń birinde qaza tapqan adamnyń qolynda jarylǵan zattyń áskerı snarád bolý múmkindigi joǵary ekeni aıtylǵan.
Osy oqıǵaǵa baılanysty mınıstrlik resmı saıtynda túsinikteme berdi.
«Qabyldaý pýnkti ıesiniń sózine qaraǵanda, 13 naýryz kúni keshke belgisiz úsh adam metal synyqtaryn alyp kelgen, onyń ishinde basqarylmaıtyn avıasıalyq snarád bolǵan. Oqıǵa boıynsha tekserý júrgizilip jatyr, barlyq jaǵdaılar naqtylanýda», - delingen Qorǵanys mınıstrligi taratqan habarlamada.
Sondaı-aq, vedomstvo kúdiktilerdiń snarádty «Qazaqstan» polıgonynan alyp kelýi múmkin ekenin de boljaǵan.
«Eskertýler men qabyldanǵan qaýipsizdik sharalaryna qaramastan metal jınaýshylar polıgonǵa zańsyz enip, snarád bólshekterin, oq-dári fragmentterin jınaıdy. Áskerı polısıa organdary júrgizgen túsindirý jumystaryna qaramastan olardy jınaý pýnktteri zańsyz qabyldaıdy», - delingen mınıstrlik habarlamasynda.
Pikir qaldyrý