Vengrıa astanasy Býdapesht qalasynda Qazaqstannyń bir azamaty koronavırýs juqtyrdy. Bul týraly Qazaqstan syrtqy ister mınıstrligi habarlady.
Mınıstrlik taratqan habarlamada vırýs juqtyrǵan áıel adam ekeni aıtylǵan.
"16 naýryzda Qazaqstannyń Vengrıadaǵy elshiligine Qazaqstannyń bir azamaty koronavırýs kúdigimen jergilikti aýrýhanalardyń birine jatqyzylǵany týraly habar tústi. Júrgizilgen medısınalyq taldaýlardyń nátıjelerine sáıkes, odan koronavırýs tabyldy. Qazirgi ýaqytta ol azamattyń densaýlyǵy turaqty, aýrýhanada emdelip jatyr. Atalǵan jaǵdaı qazaqstandyq dıplomattardyń erekshe baqylaýynda" delingen vedomstvo taratqan habarlamada.
Buǵan deıin Germanıada júrgen Qazaqstan azamatynan da vırýs tabylǵany habarlanǵan. Al Qazaqstannyń ózinde sońǵy aqparat boıynsha, barlyǵy 27 adamnan vırýs tabyldy. Olardyń 11-i Almatyda, qalǵan 16-sy Nur-Sultandaǵy aýrýhanada jatyr.
Pikir qaldyrý