Memleket basshysynyń bastamasymen qolǵa alynǵan «Biz birgemiz!» respýblıkalyq aksıasy aıasynda Elbasynyń tapsyrmasy boıynsha «Nur Otan» partıasy men Tuńǵysh Prezıdent Qory koronavırýs kezeńinde halyqtyń áleýmettik álsiz toptaryna qoldaý kórsetý úshin qarajat bóldi. Bul týraly «Nur Otan» partıasy tóraǵasynyń birinshi orynbasary Baýyrjan Baıbek facebook paraqshasynda habarlady. 
⠀
"Tek sońǵy 6 kúnde búkil el kóleminde 11 600-den astam otbasyǵa 214 mln. teńgege kómek kórsetildi.
⠀
Jalǵyz basty qarttarǵa, turmysy tómen kópbalaly otbasylarǵa, erekshe qajettilikteri bar azamattar men basqa da muqtaj jandarǵa áleýmettik paketterdi baılanyssyz úlestirip berýge erikti túrde atsalysyp júrgen «Jas Otan» volonterlary men belsendi nurotandyqtarǵa alǵys aıtamyn" delingen jazbada.