COVID-19 koronavırýsy pandemıasynyń aldyn alý maqsatynda Túrkistan oblysynyń ákimi Ómirzaq Shókeev keshendi qaýipsizdik sharalaryn qabyldady. Bul týraly oblys ákimdiginiń baspasóz qyzmeti habarlady.

Solardyń biri retinde 18-naýryzdan bastap Almaty jáne Qyzylorda baǵytyndaǵy shekaralyq aımaqtaryndaǵy «Saýran» jáne «Shaqpaq» beketterinde koronovırýs dertine baılanysty táýlik boıy jumys isteıtin blok-beketter qoıyldy. Bul beketterde polısıa jáne medısına mamandary árbir kólikti toqtatyp, arnaıy qurylǵymen azamattardyń dene qyzýlaryn ólshep, tekseristen ótkizýde.

"Atalǵan blok-beketterdiń júıeli jumysynyń arqasynda Shymkent-Nur-Sultan baǵytyndaǵy kz 646 FNB 13 regıon nómirli avtobýstaǵy koronavırýs juqtyrǵan azamatpen birge kelgen 56 adamnyń naqty deregi anyqtalyp otyr. Kóliktegi jolaýshylar týraly tolyq aqparatty Túrkistan oblysy Túlkibas aýdanyndaǵy Shaqpaq beketiniń qyzmetkerleri 20 naýryz kúni jazyp alǵan. Qazirgi kezde atalǵan azamattar oqshaýlanýǵa alyndy. Aldaǵy ýaqytta oblys turǵyndaryn saqtyq sharalaryn kúsheıtip, salǵyrttyq tanytpaýǵa shaqyramyz" delingen aqparattyq habarlamada.

Túrkistan oblysynyń shekaralyq jerlerine 35 blok-beket qoıylǵan bolatyn. Onyń ishinde 31-i eldimekenderde, al 4-i temirjol vokzaly men stansıalarda ornalasqan. Atalǵan beketterde búginde 37 medısınalyq, polısıa qyzmetkerleri jumys isteýde.

Qazirgi tańda blok-beketterdegi polısıa men medısına qyzmetkerleri jumys kúsheıtilgen rejımge kóshken. Qaýipti indetke qarsy mamandar árbir kólikti toqtatyp, arnaıy qurylǵynyń kómegimen azamattardyń dene qyzýyn ólshep, tekseristen ótkizip jatyr.