Búgin Májilis Spıkeri Nurlan Nyǵmatýlınniń tóraǵalyǵymen ótken májilistiń jalpy otyrysynda «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasy maquldandy. 

Qujat halyqaralyq tájirıbe negizinde ázirlengen. Zań jobasyna boıynsha, endi beıbit mıtıń ótkizgisi keletin qazaqstandyqtar jergilikti atqarýshy organǵa jıynǵa qansha adam qatysatynyn on bes kún buryn habarlaýy tıis. Eger jergilikti ákimdikten jaýap kelmese, beıbit jıyn kelisilgen bolyp sanalady.

Nurlan Nyǵmatýlın Májilis depýtattary, memlekettik organdar, parlamenttik emes partıalar, ÚEU men azamattyq qoǵamnyń ókilderi birlesip jumys atqarǵan jańa zań jobasy halyq únine qulaq asatyn memleket tujyrymdamasyna sáıkes keletinin atap ótti.

Otyrys barysynda depýtattar birqatar máselelerge toqtaldy. Atap aıtqanda, beıbit jınalystardy ótkizetin arnaıy oryndar máselesi.

– Menińshe, bizdiń depýtattarymyz engizgen usynys óte oryndy. Sebebi, beıbit jıyndy uıymdastyrýshylar úshin barlyq jaǵdaı jasalýy kerek. Arnaıy jıyn ótetin oryndar týraly aqparattar da ashyq bolý kerek. Áıtpese, ol oryn bos pa, bos emes pa olar qaıdan biledi? Sondyqtan, ákimdik óz saıtynda, jańa aıtylǵandaı, bos oryndar týraly aqparatty tolyq ornalastyrýy kerek. Bul qaı jaqtan alyp qarasań da paıdaly jáne tıimdi, –  dedi májilis tóraǵasy. 

Sonymen qatar, depýtattar beıbit jınalys ótkizý týraly habardar etý merzimine erekshe nazar aýdardy. Májilismenderdiń pikirinshe, úkimettik nusqada usynylǵan merzimder qysqartylýy tıis. Bul norma ekinshi oqylymǵa deıin pysyqtalatyn bolady.

Depýtattardyń pikirinshe, qoldanystaǵy BAQ týraly Zańnyń normalaryn qaıtalaıtyn jýrnalıserdiń quqyqtary týraly úkimettik nusqada usynylǵan normalardy qaıta qaraý qajet. Ázirleýshilerdiń, sondaı-aq İİM ókilderiniń túsiniktemelerin tyńdaǵannan keıin májilismender normalar sanyn qysqartý men pysyqtaýdyń mańyzyn atap ótti.

Talqylaýdy qorytyndylaı kele Nurlan Nyǵmatýlın zań jobasynyń úkimettik nusqasy túrli alańdarda, sonyń ishinde óńirlerde talqylanǵannan keıin eleýli ózgeristerge ushyraǵanyna toqtaldy.

Budan basqa, ekinshi oqylymǵa deıin jumys toby túzetýler men tolyqtyrýlardyń sońǵy redaksıalaryn pysyqtaýǵa tıis. Májilis Tóraǵasy bul mıtıńiler týraly zań jobasy halyq únine qulaq asatyn memleket tujyrymdamasyna sáıkes keletinin aıtyp, zań jobasy jınalystar men mıtıńilerdi uıymdastyrý men ótkizýdiń qoldanystaǵy tájirıbesin túbegeıli ózgertetinine jáne azamattardyń quqyqtary men olardyń jınalystar men mıtıńilerdi ótkizý kezindegi jaýapkershilikteriniń ońtaıly úılesimin qamtamasyz etýge nazar aýdardy.